اسلام آباد۔ 26دسمبر (اے پی پی) پاکستان مسلم لیگ (ن) نا راہشون طلال چوہدری پارینے کہ السی عدالت اٹی بے سہب مروک آ کانود نا عدالت اٹی ہم بے سہب ثابت مریک، پی ٹی آئی خیبرپختونخوا ٹی سرکاری خڑچہ غا جلسہ کننگ اٹی ئِ، پاکستان نا ادارہ غاک آجوئُ، فیصلہ میرٹ و شاہدی تیا کننگک۔ دوشنبے آ داڑے الیکشن کمیشن نا پیشن میڈیا تون ہیت وگپ کرسا اوپارے کہ عمران خان الیکشن کمیشن اٹی بدعنوان ثابت مسنے، چیئرمین پی ٹی آئی و جنرل سیکرٹری نا جوڑی ہرا تحریک انصاف نا راہشونی ئِ کریکہ، پی ٹی آئی ئِ ہائی جیک کرینے۔ اوپارے کہ الیکشن کمیشن اٹی اونا برخلاف ریفرنس نا سماعت ئس و کیہی وار اونا وکیل پارینے کہ دزی نن کرینن ولے اونا باوجود الیکشن کمیشن ئِ پائک کہ نی کیس انا سماعت ئِ کننگ کپیسہ۔ اوپارے کہ پی ٹی آئی اٹ وار دلیل آتے بدلیفسا و کانود نا سیبو پٹسا تینے ڈکسا کرینے۔ طلال چوہدری پارے کہ السی عدالت اٹی بے سہب مروک آ کانود نا عدالت اٹی ہم بے سہب مریک۔اوپارے کہ عمران خان عدالت اٹی بنی گالہ نا ماڑی نا بابت پائک کہ ای لندن نا فلیٹ ئِ سودا کرسا دادے ہلکٹ، وخت اس پائک کہ کرکٹ نا کٹیا آن دادے جوڑکریٹ و وخت اس پائک کہ دا مہالو نا اُرائی دادے گفٹ کریسس ولے ہراتم کاغد آتا جانچ پڑتال ئِ کننگک تو اونا شاہدیک ملیپسہ، اینو اسہ وار ولدا عمران خان و جہانگیرترین نا وکیل دا دے ولدا امنا کرینو کہ دزی ننے آن مسنے ولے سزا الیکشن کمیشن تننگ کپک۔ اوپارے کہ عدالت آتیا زورشاغنگ کن پی ٹی آئی سرکاری خڑچہ غا خیبرپختونخوا ٹی جلسہ کننگ ئِ ، او مرضی نا فیصلہ بفننگ آروڈ آتیا برانز نا دھڑکو تننگ ئِ۔ اوپارے کہ عمران خان نا مرضی نا فیصلہ برے تو سہی و اگہ اونا مرضی نا فیصلہ بف تو کل گڑاک غلط مریرہ ۔ اوپارے کہ پاکستان نا ادارہ غاک آجو ئُ دا نہ داکان مست پریشرائز مسنو و نہ پین وخت اس مریرہ۔ فیصلہ میرٹ نا بنداو آمریک و میرٹ آ فیصلہ شاہدی تیا مریک، پکوڑہ سودا کروک آ کاغد آتیا مفک۔ اوپارے کہ پیپلز پارٹی والا ننا سنگت آک خوش ئُ کہ زرداری صاحب پدی بسنے سیوت ئِ جوڑ کیک، زیرو جمع زیرو نتیجہ تو زیرومریک ہرا کراچی آن کچرہ تے ہرفنگ کپسہ او دا وزیر داخلہ غا تنقید کیرہ ہرا 250بندغ آتا خونی تے ہلک، 250 ارب روپئی پلوک آتے ہلنگ نا کوشست کرے۔ 2018ءٹی ہم پاکستان مسلم لیگ ہی حکومت جوڑ کیک ۔ محمد نواز شریف ہی وزیراعظم مریک ۔
