اسلام آباد۔ 26دسمبر (اے پی پی) بنجائی وزیر مذہبی امور و بین المذاہب ہم آہنگی سردار محمد یوسف پارینے کہ دہشت گردی و فرقہ واریت نا چٹفنگ کن اواری اٹ کاریم کننگ نا گرج ئِ۔ ریڈیو پاکستان تون ہیت وگپ کرسا اوپارے کہ قائداعظم نا دے و نن نا خواری آن ننے وطن عزیز ملا و قائد اعظم قوم اتون فائفے کہ ایمان، سیوت و سخا آ عمل کننگ اُٹ، داسہ ننا زمواری ئِ کہ نن غٹ اسٹ مرین و قائد نا فرمودات آتے عملی جامہ اس بیرفن۔ سردار محمد یوسف پارے کہ وطن عزیز ئِ معرض وجود اٹی بس 70سال گدرینگ انگ آن گڈ وزیراعظم محمد نواز شریف نا سروکی ٹی پاکستان ئِ موقع ملا نے کہ ڈیہہ ٹی تینا اہمیت و لائخی ئِ ودی کے۔ اوپارے کہ مسلم لیگ (ن) نا قائد میاں محمد نواز شریف نا سروکی ٹی پاک چین اقتصادی راہداری ڈٹ اتون اوار ایلو شونداری پروجیکٹ آتا اجراءآن ملکی معیشت اٹی گچینی بسنے و بروک آ وخت آتیٹی پاکستان پین شون ہلیک۔ اوپارے کہ پاکستان نا اڈہلنگ نا وخت اسہ ہی نعرہ اس خلنگاسس ، پاکستان نا مطلب انت ئِ، لاالہ الا اللہ“ و اینو ہم نن دانعرہ غا عمل کننگ اُن۔ بنجائی وزیر پارے کہ غٹ مذہب و فرقہ غاتا خلقت اواری اٹ پاکستان نا اڈہلنگ کن جہد کریسر و ہنداسوب ئِ کہ اینو پاکستان اٹی غٹ مذہب و فرقہ نا خلقت آزادانہ زند تدیفنگ ئُ۔ دہشت گردی و فرقہ واریت نا چٹفنگ اٹی وزارت مذہبی امور نا کڑد انا بابت سوج انا ورندی ئِ ترسا اوپارے کہ مسکوہی ٹی فرقہ واریت آن ملک و قوم ئِ نسخان ہرفوئی تما ولے داسہ وزارت مذہبی امور و بین المذاہب ہم آہنگی داڑکن اہم گام گیج کننگ ئِ و اولیکو وار پاکستان اٹی قومی عالم دین و مشائخ کونسل کونسل جوڑ کننگا ہراٹی غٹ فرقہ غاتے نمائندگی تننگانے۔ اوپارے کہ دہشت گردی و فرقہ واریت نا چٹفنگ کن اینخو سال لاہور اٹی اڈ تروک آ سیرت کانفرنس اٹی غٹ فرقہ غاتا عالم دین آتون اوار ایلو مذہب آتا سرکڑدہ غاتے ہم اوار کننگا ہراڑآن مچ آ دنیا ٹی پاکستان نا مثبت تشخص و یکجہتی نا درشانی مسنے۔
