کانفرنس نا اڈتننگ آن جہانی نیوز ایجنسی تا نیام اٹ رابطہ غاک پین سوگو مریرہ، ایم ڈی ’’اے پی پی‘‘ مسعود ملک
اسلام آباد۔ 14مئی(اے پی پی) وزیر دفاع انجینئر خرم دستگیر خان پارینے کہ پاکستان تینا الس و سلہہ بند فوج انا عزم و حوصلہ و قربانی تا سوب دہشت گردی نا عفریت نامون ءِ تورسا ناممکن ءِ ممکن جوڑ کرینے، پاکستان اٹی چترال آن کراچی اسکان امن مسنے، اینو پاکستان اسہ نزور ءُ ڈیہہ اسے ٹی سوگو ءُ ملک اس جوڑ مسنے، ملک اٹی جمہوریت سوگو مسنے، پاکستان اٹی میڈیا ءِ پورو آزادی دوئی ءِ اودے نن برقرار تخنہ، آئین اظہار رائے ناآجوئی نا ضامن ءِ و دارداٹ پاکستان نا جمہوریت گچین و سوگو ءُ ضمانت اسے، حکومت اقتصادی شونداری ءِ المی جوڑ کرے و توانائی تون اوار مون تروک چیلنج آتا مون ءِ تورے ، سی پیک آن پاکستان نا دنیا نا بھاز انگا ملک آتون رابطہ سوگو مریک۔ اودوشنبے نا بیگہ غا اے پی پی نا کنڈآن خبررساں ادارہ غاتا جہانی کانفرنس نا ایسری نشست آن تران کریکہ۔ منیجنگ ڈائریکٹر ایسوسی ایٹڈ پریس آف پاکستان (اے پی پی) مسعود ملک و اے پی پی نا کمامدارآک ہم ساڑی ئسر۔ آئی سی این اے ٹی چین ، انڈونیشیا ء، آذربائیجان، ایران ، رومانیہ ، اومان ، بلغاریہ ، ترکی ، قزاخستان ، لبنان ، سوڈان ، تیونس ، سعودی عرب و شام اتون اوار 18 ملک آتیان 21 مندوبین آک ساڑی ئسر۔ وزیر دفاع خرم دستگیر خان 18 ملک آتا 21مندوبین آتے پاکستان اٹی اے پی پی نا کنڈآن کانفرنس اٹی بشخ ہلنگ آ خیرمقدم کرے وو اے پی پی نا کنڈآن جہانی کانفرنس نا میزبانی آ مبارکباد پیش کرسا اودے اسہ شاندار ءُ گام گیج اس گوندا۔ اوپارے کہ 2013ء ٹی ہردے دہشت گردی نا واقعہ غاک مسورہ، 6ہزار فوجی آفیسر و ورناک، 18 ہزار شاری تا قربانی تتون اوار پاکستان دہشت گردی نا مون ءِ تورینے، انشاء اللہ بروک آ وخت اٹی پاکستان اٹی پین گچینی بریک۔ اوپارے کہ آئین نا آرٹیکل 19 اظہار رائے نا آجوئی نا گارنٹی ءِ ایتک ، آزادی اظہار رائے الس نا بنداوی حق ءِ۔ اوپارے کہ پاکستان گدرینگوک آ چار سال اٹی دہشت گردی، توانائی تنکی، اقتصادی بدحالی نا جوانی اٹ مون ءِ تورسا معیشت ءِ شون نا کسر آ روان کرے۔ اوپارے کہ پاکستان دہشت گردی و انتہاء پسندی نا برخلاف سرسہب جنگ کرینے و دنیا نا ہر ملک آن زیات قربانی ہم تس ، دہشت گردی نا برخلاف جنگ اٹی ننا 6ہزار فوجی آفیسر و ورناک و 18 ہزار آن زیات شاریک جان تا قربانی ءِ تسر و ہزار آک ٹھپی مسر و ملکی معیشت ءِ ارب آ ڈالر نا نسخان مس۔ حکومت نا کوشست آتیان اینو چترال آن کراچی، بلوچستان ، فاٹا تون اوار ملک انا ہر بشخ اٹی پورو امن مسنے۔ وزیر دفاع خرم دستگیر پارے کہ حکومت نا گچین معاشی پالیسی تا سوب ملک انا جی ڈی پی 6 درسد آ سرمسنے وخت اس کہ بروک آ سال تیٹی داٹی پدریسہ ودکی مریک۔ اوپارے کہ پاکستان نا جمہوریت سوگو مننگ ءِ، مئی 31 ارٹ میکو گچین حکومت تینا مد ءِ پورو کیک۔ اوپارے کہ پاک چین اقتصادی راہداری نا کمک اٹ نیامی ایشیا و ڈیہہ نا غٹ ملک آتا نیام اٹ اقتصادی و واپاری رابطہ غاتے ٹی ترندی بریک داڈٹ آن پاکستان ہزار آ ورناتے روزگار ناوارخواہی و ڈیہہ نا غٹ الس ءِ اقتصادی فائدہ دوبریک۔ اوکان پد وزیر دفاع خرم دستگیر خان کانفرنس نا بشخ ہلوک آتے ٹی سوینئر بشخ وپانٹ کرے۔ داکان مست ’’اے پی پی‘‘ نا منیجنگ ڈائریکٹر مسعود ملک تینا تران اٹی پارے کہ کانفرنس موقع تس کہ پاکستان اسہ پرامن و شون ہلوک ءُ ملک اسے۔ کانفرنس نا بشخ ہلوک آتے پاک چین اقتصادی راہداری نا بابت معلومدار کرسا اوپارے کہ داڑآن پاکستان نیامی ایشیاو بحیرہ عرب نا کمک اٹ ڈیہہ نا ایلو ملک آتون گنڈنگک۔ ایم ڈی اے پی پی مستی پارے کہ دا کانفرنس نا اڈتننگ آن جہانی نیوز ایجنسی تا نیام اٹ رابطہ غاک پین سوگو مریرہ۔ اوپارے کہ خبر رساں ادارہ غاتا کڑد ءِ ہچ ءُ دروشم اسے اٹ گوجالنگ گنگ پک۔ سوشل میڈیا مرے یا آن لائن اخبارآک مریر او ہر حال اٹ نیوز ایجنسی تتون رابطہ کیرہ۔ اوپارے کہ صحافی بریکنگ نیوز نا دوڑ اٹ صحافت نا بنداوی اصول و حق ءِ مون آ تخر۔ لبنان نانیشنل نیوز ایجنسی نا ڈائریکٹر جنرل لارے سلیمان درملکی مندوبین آتا کنڈآن شاندار مہمان نوازی آ پاکستان نا منت واری ءِ ہرفے۔ اوپرتپاک مہمان نوازی آ ’’اے پی پی‘‘ نا انتظامیہ نا ہم منت واری ءِ ہرفے و آخبت کن تینا نیک است خواہی تا درشانی ءِ کرے۔
