ہردے ئی ڈان اٹی 12مئی آ ممبئی جلہو آتا رداٹ شینک مروک آ بیان غلط و گمراہ کن قرار، گمراہ کن داوا تا مذمت
پاکستان دہشت گردی نا برخلاف غٹ محاذ آتیا جنگ اٹ تینا پبی کڑد ءِ برجاتخک، قومی سلامتی کمیٹی
اسلام آباد۔ 14مئی (اے پی پی) وزیراعظم شاہد خاقان عباسی نا کماشی ٹی دیوان اٹ قومی سلامتی کمیٹی انگریزی ہردے ئی ڈان اٹی 12مئی آ ممبئی جلہو آتا رداٹ شینک مروک آ بیان ءِ غلط و گمراہ کن گوندسا دادوبہ غاتے مسترد و داگمراہ کن داوا تا مذمت ءِ کرینے۔ وخت اس کہ کمیٹی گوندانے کہ ممبئی جلہو آتا کیس ءِ ایسری انجام اسکان سرکننگ اٹ ہرے کننگ نا زمہ وار پاکستان آخا بلکن بھارت ءِ۔ وزیراعظم آفس نا کنڈآن جاری پریس ریلیز نا رداٹ قومی سلامتی کمیٹی نا 22می دیوان دوشنبے نادے وزیراعظم شاہد خاقان عباسی نا کماشی ٹی ایوان وزیراعظم اٹ اڈ ہلک۔ دیوان اٹی وزیر دفاع و خارجہ امور خرم دستگیر ، وزیر خزانہ مفتاح اسماعیل ، چیئرمین جوائنٹ چیفس آف اسٹاف کمیٹی جنرل زبیر محمود حیات، چیف آف آرمی اسٹاف جنرل قمر جاوید باجوہ ، چیف آف نیول اسٹاف ایڈمرل ظفر محمود عباسی، چیف آف ایئر اسٹاف ایئر چیف مارشل مجاہد انور خان، ڈائریکٹر جنرل آئی ایس آئی لیفٹیننٹ جنرل نوید مختار، قومی سلامتی نا سلاہکار لیفٹیننٹ جنرل (ر) ناصر خان جنجوعہ و بڑزکو سول و فوجی کمامدارآک ساڑی ئسر۔ دیوان اٹی ممبئی جلہو آتا رداٹ ہردے ئی ڈان اٹ 12مئی 2018 ء آ شینک مروک آ بیان نا جاچ ءِ ہلنگا۔ ساڑی مروک آک دا بیان ءِ امنائی اٹ غلط و گمراہ کن گوندار۔ ساڑی مروک آک پاریر کہ بدقسمتی اٹ دا بیان آن ہراتاثر جوڑ مسنے و ہرا رائے مون آ بسنے او نئے بیرہ غلط فہمی آ مبنی ءِ بلکن داٹی ٹھوس حق آتے ہم گوجالنگانے۔ ٹھوس حق آتا برعکس بیان جاری کننگ افسوزناک ءِ۔ ساڑی مروک آک امنائی اٹ دادوبہ غاتے مسترد کرسا گمراہ کن داواتا مذمت ءِکرینو۔ ساڑی مروک آک گوندار کہ ممبئی جلہو کیس ءِ ایسری انجام اسکان سرکننگ اٹ ہرے کننگ نا زمہ وار پاکستان آخا بلکن بھارت ءِ۔ جاست وپاست اٹی کمک آن انکار آن بدس بنجائی دوبہ دار اجمل قصاب اسکان رسینگ آن ہم انکار کننگا و اودے عجلت اٹ پاہو تننگ ہم داکیس ءِ ایسری انجام اسکان سرکننگ اٹ بنداوی اڑاند جوڑ مس۔ ہنداوڑ پاکستان سمجھوتا ایکسپریس و جاسوس کلبھوشن یادو آ پدریسہ بھارت نا کنڈآن کمک نا چاری ءِ۔ قومی سلامتی کمیٹی دا عزم انا درشانی ءِ کرے کہ پاکستان دہشت گردی نا برخلاف غٹ محاذ آتیا جنگ اٹ پبی کڑد ءِ برجاتخک۔
