اسلام آباد۔ 13 مئی (اے پی پی) پاکستان ءَ ھوار 19 ملک آنی نیام ءَ ھال رسانکی ایجنسی آنی کزبی کمک ءِ تہ ءَ گیشی ءِ ضلورت ءِ سر ءَ زور پر دیان ءَ پرنٹ ءُُ الیکٹرانک میڈیا ءِ گیش بوھوکیں ضلورت ءَ را پیلو کنگ ءِ رد ءَ اھوال، اکس ءُُ ویڈیونیوز فوٹیج ءِ یک ءُُ دگر ءَ دیگ ءِ سر ءَ تپاک کنگ بوت۔ یک شمبے ءِ روچ ءَ راجی ھال رسانکی ادارگ ایسوسی ایٹڈ پریس آف پاکستان(اے پی پی)ءِ چیر دستی ءَ نیوز ایجنسیز ءِ دو روچی کانفرنس ءِ ساھت ءَ جتا جتائیں ملک آنی نماھندگ آں ’’اے پی پی‘‘ ءَ را گلگدار دیان ءَ اے جزم ءِ درشان کت کہ آ ’’اے پی پی‘‘ ءِ گوما کزبی کمک ءَ را دیمروئی دینت۔ کانفرنس ءَ شریکیں انڈونیشیا ءِ راجی ھال رسانکی ادارگ ’انطارا‘ ءِ نماھندگ ایلسوان ایزلے ءَ یک جُستے ءِ پسو ءَ گوشت کہ آ ’’اے پی پی‘‘ ءِ گوما اھوال آنی یک ءُُ دگر ءَ دیگ ءَ را ودینگ لوٹ ایت، اے مول ءُُ مراد ءِ واستہ زوت کار رپک زوت سہرا کنگ بیت۔ آئی ءَ گوشت کہ انڈونیشیا ءَ 113نیوز چینلز کار کنگ ءَ انت ءُُ انطارا ءَ را پاکستان ءَ چہ ویڈیوفوٹیج ءِ ضلورت اِنت۔ انطارا ءِ میاں اوستمانی تک ءِ شاھیگانی نیٹ ورک برجا اِنت آھودا ھمک روچ کساس 1300سٹوریز ریلیز کنگ بنت۔ مئے نیوز ایجنسی ءِ سئے سد سبزکرائبر اَنت ءُُ 60درسد فنڈ حکومت ءِ نیمگ ءَ پُجاری کنگ بنت۔ آئی ءَ گوشت کہ انطارا آیوکیں دو سال ءَ تاں اھوالتاک ءُُ نیوز چینلز آناں نیوز سٹوریز ءُُ ویڈیو فوٹیجز مُپت ءَ پُجارینگ ءَ اِنت۔ آذربائیجان نیوز ایجنسی ’’آذر ٹیک‘‘ ءِ نماھندگ گونل ملیکوف ءَ گوشت کہ پاکستان براتیں ملک اِت ءُُ آذربائیجان پاکستان ءِ گوما میڈیا ءَ ھوار توامیں شوبگ آنی تہ ءَ توامیں شوبگ آنی تہ ءَ دو نیمگی یکوئی ءَ را گیش دیمروئی دیگ ءِ واھشت مند آں۔ آئی ءَ گوشت کہ آذرٹیک آذری ءَ ابید دُگنیا ءِ دھ زبان آنی تہ ءَ ایندگر ملک آنی گوما اھوال ءُُ ویڈیو فوٹیجز آنی یک ءُُ دگر ءَ دیگ ءَ اِنت۔ چیف ایگزیکٹیو آفیسر یونان نیوز ایجنسی ’’اے این اے‘‘ میچالس سیلوس ءَ گوشت کہ پاکستان یک المی ایں ملک اِت ءُُ مئے نیوز ایجنسی اے پی پی ءِ گوما اھوال ءُُ ویڈیو فوٹیجز آنی یک ءُُ دگر ءَ دیگ ءِ ھوالگ ءَ منوگری ءِ واستہ تیار اِنت۔ آئی ءَ گوشت کہ یونان پاکستان ءِ گوما دو نیمگی یکوئی آناں دیمروئی دیگ ءِ واھشت مند اِنت۔ آئی ءَ گوشت کہ یک لکھ ءَ چہ گیش پاکستانی یونان ءَ کار کنگ ءَ اَنت ءُُ یونان ءِ اقتصادی ءُُ وشھالی ءَ ارزشتی ایں کرد پیلو کنگ ءَ انت۔
