قومی سلامتی نا سلاہکار بشخ ہلوک آتے دستاویزی فلم نا کمک اٹ پاکستان نا دودوربیدہ و زیبا انگا علاقہ غاتا بابت معلومدار کرے
اسلام آباد۔ 13مئی (اے پی پی) وزیراعظم نا سلاہکار قومی سلامتی لیفٹیننٹ جنرل (ر) ناصر خان جنجوعہ پارینے کہ پاکستان دہشت گردی نا برخلاف جنگ اٹی بے مثل قربانی ترسا سرسہبی دوئی کرینے، پاکستان آ ڈبل گیم انا دوبہ ءِ خلنگ ناجاگہ غا جہانی برادری ءِ داقربانی تے بایدے امنا کروئی مرے، پاکستان ، اوغانستان نا سالمیت و علاقائی وت واجہی نا شرف ءِ کیک، سوویت یونین نا چٹفنگ آن پد امریکہ و جہانی برادری داکان ہنا و ننے آخبت ناحالیت آتون مون تننگ کن تنیا ہلا، بلوچستان و کراچی ٹی گٹ کننگا۔ نن فاٹا تون اوار ہر جاگہ غا مقابلہ کرین، پاک اوغان بارڈر آ غٹ آن بڑز انگا ہند 24ہزار فٹ ءِ۔ نن دنیا ءِ دا مشکل انگا علاقہ ٹی دہشت گردی نا برخلاف جنگ کرین۔ او یک شنبے نادے اے پی پی نا کنڈآن خبررساں ادارہ غاتا نیام اٹ شریداری نا مون آ دننگ کن ’’پاکستان نامیڈیا:وارخواہی و چیلنج ‘‘ آتا سرحال آن 2دے ئی ’’انٹرنیشنل کانفرنس آف نیوز ایجنسیز ‘‘ (آئی سی این اے‘ ٹی بشخ ہلوک آتیان جہانی و علاقائی امن اٹی پاکستان نا کڑد انا بابت تران کریکہ۔ بنجائی وزیر اطلاعات و نشریات مریم اورنگزیب کانفرنس نا بنائی دود اٹی مہمان اعزاز نا وڑاٹ ساڑی ئس۔ ایڈیشنل سیکرٹری وزارت اطلاعات و نشریات شفقت جلیل، منیجنگ ڈائریکٹر ایسوسی ایٹڈ پریس آف پاکستان (اے پی پی) مسعود ملک، وزارت اطلاعات و نشریات و اے پی پی نا کمامدارآک ہم ساڑی ئسر۔ آئی سی این اے ٹی چین، انڈونیشیا، آذربائیجان، ایران، رومانیہ، اومان، بلغاریہ ، ترکی ،مصر ، قزاخستان ، لبنان ، سوڈان ، تیونس ، سعودی عرب و شام اتون اوار 16ملک آتیان 20 مندوبین شریک ءُ۔ قومی سلامتی نا سلاہکار لیفٹیننٹ جنرل (ر) ناصر خان جنجوعہ اے پی پی نا کنڈآن دنیا نا چندی ملک آتا نیوز ایجنسی تا کانفرنس نا اڈتننگ نا کوشست آتا ستاءِ کرے و پارے کہ داکانفرنس آن جہانی کہول آ پاکستان نا گچین دروشم تالان مریک۔ اوپارے کہ امریکہ اوغانستان اٹی طالبان تا حکومت ءِ چٹفے ہراڑآ طالبانک امریکہ و جہانی برادری ءِ کوزہ گیرگوندار۔ اینو ہم طالبانک دا جنگ ءِ تینا وطن نا آزادی نا جنگ پارہ۔ اوپارے کہ امریکہ ننے آ طالبان تا مخ تفی و طالبانک ننے آ امریکہ نا مخ تفی نا دوبہ ءِ خلنگ ءُ۔ اوفک سوج کریر کہ اگہ پاکستان امریکہ نا سیوتی جوڑ مسکہ تو انت اینو اوغانستان آجو مسکہ۔ اگہ سوویت یونین برجاسلیسکہ تو انت دیوار برلن تماکہ، انت 14ملک آک آزادی حاصل کریرہ، انت امریکہ سوویت یونین نا ساڑی گری ٹی سپر پاور جوڑ مسکہ۔ اوپارے کہ سوویت یونین نا چٹفنگ آن پد امریکہ و جہانی برادری داکان ہنا و ننے آخبت نا حالیت آتون مون تننگ کن تنیا ہلا۔ اوپارے کہ نن پاک اوغان سیم آ فوج تعینات کرین، پاکستان و اوغانستان نا نیام اٹ 2611کلومیٹر مریس سیم ءِ ہرا شیف بڑز سخت انگا علاقہ غاتیا تالان ءِ۔ پاک اوغان سیم آ غٹ آن بڑزانگا ہند 24ہزار فٹ ءِ۔ دا دنیا نا دشوار انگا علاقہ ءِ دنیا ءِ بایدے مرے کہ او برے و داڑے ننتون کمک کے۔ اوپارے کہ ننے فاٹا، بلوچستان و کراچی ٹی گٹ کننگا اونا باوجود نن فاٹا تون اوار ہر جاگہ غا مقابلہ کرین۔ اوپارے کہ دہشت گرد آتا پاکستان تون ہچ ءُ تعلق اس اف، دہشت گردی نا برخلاف جنگ اٹی پاکستان نا ہزار آشاریک، سیکورٹی ادارہ غاتا آفیسر آک و ورناک شہید مسر۔ بے پناہ قربانی تا باوجود ننے آ دوہرہ معیار نا دوبہ ءِ خلنگک۔ اوپارے کہ پاک فوج پاک اوغان بارڈر و فاٹا کون آ مشکل علاقہ غاتے ٹی آپریشن کرے، ہرادے پین کس کننگ کپک۔ اوپارے کہ سوویت یونین نا چٹفنگ آن پد امریکہ و جہانی برادری داکان ہنار، جہانی برادری ننے آخبت حالیت آتون مون تننگ کن ہلا، 11/9ہندا حالیت آتا نتیجہ ئس ہرادے جہانی برادری نیمہ غا ہلا، امریکہ اوغانستان اٹی طالبان تا حکومت ءِ چٹفے۔ طالبانک امریکہ و جہانی برادری ءِ کوزہ گیرگوندار، اینو ہم طالبانک داجنگ ءِ تینا وطن نا آزادی نا جنگ پارہ۔ اوپارے کہ امریکہ ننے آ دوبہ خلنگ ءِ کہ نن طالبان تا مخ تفی ءِ کننگ اُن ، داڑے طالبانک ننے آ دوبہ خلنگ ءُ کہ نن امریکہ نا مخ تفی ءِ کننگ اُن۔ بلوچستان نا مثال ءِ پیش کرسا ناصر جنجوعہ نا پاننگ ئس کہ نن کراچی ٹی دہشت گرد آتا برخلاف جنگ کرسا امن ءِ بحال کرین، مستین اٹی بلوچستان اٹی پاکستان نا بیرک ءِ خاخر تننگا، بلوچستان اٹی یکجہتی نا کمتی ئس ، ہراڑآن احساس محرومی ودی مس، نن بلوچستان اٹی ویل آتے ماس آن کشنگ آن بیدس اڑاند آتا برخلاف جنگ کرینہ۔ اوپارے کہ نن واک انا بیدس مابت نا حکمت عملی ءِ اختیار کرین، اینو بلوچستان اٹی خلقت سلہہ غاتے بٹیر، اینو بلوچستان اٹی ملک انا ایلو بشخ آتیان زیات قومی پرچم ءِ چست کننگ انگ ءِ۔ اوپارے کہ اقوام متحدہ نا امن مشن اٹی پاک فوج تینا پبی کڑد ءِ ادا کننگ ءِ۔ اوپارے کہ چین پاکستان اقتصادی راہداری ڈٹ آن ڈیہہ ٹی معاشی و اقتصادی سرجز آتے مون آ دننگک، پاکستان نا خلقت ءِ روزگار نا گچین وارخواہی ملک۔ اوپارے کہ آخبت اٹی پاکستان نیام ایشیائی ملک آتون مچ آ دنیا کن اقتصادی سرجزآتا بنجا جوڑ مریک ہراڑآن شونداری نا پوسکن آ دور بناء کیک۔ قومی سلامتی نا سلاہکار بشخ ہلوک آتے دستاویزاتی فلم نا کمک اٹ پاکستان نا دودوربیدہ و زیبا انگا علاقہ غاتا بابت معلومدار کرے۔
