ایم ڈی اے پی پی مسعود ملک و ڈیلی ملٹی میڈیا چین نا ڈپٹی ایڈیٹر انچیف لائی چی لی ناپاکستان نا 70 می سال دے انا بابت نیوز ایجنسی تا جہانی کانفرنس نا وخت آ معاہدہ غا دستخط کریر

اسلام آباد۔ 13مئی (اے پی پی) قومی خبررساں ادارہ ایسوسی ایٹڈ پریس آف پاکستان و چائنا ڈیلی ملٹی میڈیا نا نیام اٹ خبر آتا تبادلہ و چین وپاکستان اٹی زیات آن زیات احوال آتسکان رسینگ کن شریداری ءِ ودفنگ نا بابت اسہ معاہدہ اس پک مسنے۔ ہرانا رداٹ ہڑتوم آ ادارہ غاک اسہ ایلو ءِ احوال آتسکان رسینگ نا بابت ہروڑکمک فراوان کیرہ۔ دا چرجوئی ٹی تدوک آ دے اے پی پی نا منیجنگ ڈائریکٹر مسعود ملک و ڈیلی ملٹی میڈیا چین نا ڈپٹی ایڈیٹر انچیف لائی چی لی نا نیام اٹ اے پی پی ہیڈ کوارٹر اٹی معاہدہ سے آ دستخط مس۔ دا معاہدہ پاکستان نا 70 می سال دے انا بابت نیوز ایجنسی تا جہانی کانفرنس نا وخت آ طے مسنے۔ اے پی پی وزارت اطلاعات و نشریات نا انتظامی و مالیاتی کنٹرول نا رداٹ تینا فرض ءِ سرانجام ایتک وخت اس کہ ڈیلی ملٹی میڈیا چائنا چینی کانود نا رداٹ کانودی حیثیت تخک۔ ہفتہ نا نن ڈیلی ملٹی میڈیا چین اتون طے مروک آ معاہدہ نا رداٹ ہڑتوم آ ادارہ غاک ضمنی معاہدہ غاتیا دستخط آتیان پد اِراہفتہ نا تہٹی احوال آتسکان رسینگ نا وڑوڈول نا تعین ءِ گڈیکو دروشم ایترہ۔ ڈیلی ملٹی میڈیا چین اے پی پی ءِ تینا ہوم پیج آ انفرادی لاگ ان و پاسورڈ فراوان کیک۔ ہنداوڑ اے پی پی ہم تینا ہوم پیج آ ڈیلی ملٹی میڈیا چین ءِ انفرادی لاگ ان و پاسورڈ فراوان کیک۔ ہڑتوم آ کنڈآتیان داہیت آ امنا کننگانے کہ ہڑتوم آ ادارہ غاک گرج انا وخت آ اسہ خاص ءُ حد اسسکان اسہ ایلو ءِ احوال آتسکان رسینگ ءِ المی جوڑ کیرہ ۔ داڑکن چائنا ڈیلی ملٹی میڈیا نا ہوم پیج آ شیفکو بشخ اٹی جاگہ اس جتا کننگک۔ داجاگہ میڈیا پارٹنر نا سیکشن آن شیف مریک و داٹی پاکستان نا قومی خبررساں ادارہ (اے پی پی) نا لوگو و اونا کنڈآن جاری کروک مسہ آرٹیکل مریرہ۔ کڑدہ غاک داوڑاٹ پورو معلومداری اسکان رسینگ تننگ آن ہم امنا کریر ہرانا رداٹ اے پی پی داضمنی معاہدہ غا دستخط آتا اِراہفتہ نا تہٹی تینا ہوم پیج آ چائنا ڈیلی نا پن اٹ ڈیلی ملٹی میڈیا اسکان اسہ انفرادی لاگن و پاسورڈ اسے نا کمک اٹ رسائی ایتک۔ داخاص انگا ایریا اے پی پی نا ہوم پیج انا ارٹ میکو سکرین آن شیف مریک و ہڑتوم آ کڑدہ غاک دامواد آتیا خیال آتا درشانی و ہیت وگپ کننگ کیرہ ہرا اسہ کڑدہ سے نا کنڈآن تننگوئے و سہ کڑدہ ءِ دافیصلہ کننگ نا حق دوئی مریک کہ او ایلو کڑدہ نا تروک آ مواد آتے کاریم اٹ اتے یا اتپ بشرطیکہ دامواد آتا بابت خصوصی ضوابط اس ساڑی مفئے۔ کڑدہ غاک مواد آتا حادثاتی وڑاٹ زیان مننگ یا دُزی مننگ آن رکھ پین مسٹ میکو کڑدہ سے نا کنڈآن دُن انگا ہرکوشست ءِ دمدستی رپورٹ کننگ و آخبت اٹی مواد آتا دزی نا دُن انگا کوشست آتے توننگ کن اواری اٹ گام گیج ہرفنگ آ امنا کریر۔ معاہدہ نا رداٹ ہرکڑدہ ءِ دااختیار دوئی مریک کہ او کمکاری نا خاص انگا ایریا کن اوار کننگ کن خبر اسے نا گچینی ءِ کے یا دادے اپ ڈیٹ کے۔ منیجنگ ڈائریکٹر اے پی پی مسعود ملک ضمنی معاہدہ ءِ اے پی پی نا دنگ ءِ ودفسا اودے چین و پاکستان نا ایلو بشخ آتے ٹی قارئین آتسکان رسینگ نا چرجوئی ٹی اہم پیش رفت اس گوندا۔ اوداموقع غا ادارہ نا کنڈآن ایلو ملک آتا قومی خبررساں ادارہ غاتون دُن انگا معاہدہ غاتا لائخی ءِ ودفنگ نا عزم انا اعادہ ءِ کرے وپارے کہ داانٹرنیشنل کانفرنس نا وخت آ اے پی پی تینا نیوز کوریج ءِ گیشتر کننگ کن پین معاہدہ غاک گمان ارے۔