واشنگٹن۔ 13مئی (اے پی پی) امریکہ ٹی پاکستان نا سفیر اعزاز احمد چوہدری امریکہ ٹی رہینگوک پاکستانی برادری و پاکستان نا دورہ نا خواہش مند شاری تے آسراتی تیٹی پین گچینی اتنگ کن سفارت خانہ ٹی ری ماڈلڈ قونصلر ونگ انا بناءِ کرے۔ داوخت آ پاکستانی کمیونٹی و میڈیا نا نمائندہ غاک ہم ساڑی ئسر۔ اعزاز چوہدری داوخت آ تینا تران اٹی پارے کیہ تینا عہدہ نا زمواری ءِ سنبھالنگ تون ہی او پاکستانی برادری و پاکستان نا دورہ نا خواہش مند شاری تے آسراتی تیٹی پین گچینی اتنگ نا عہد کریسس۔ اوسفارت خانہ و ہر چار آ قونصل خانہ غاتے ٹی چست کروک آ گام گیج آتا ذکر ءِ کرے وپارے کہ دارداٹ قونصل جنرلز نا اِرا کانفرنس اڈ ہلک ہرافتے ٹی خذمت آتے گچین جوڑ کننگ نا بابت معاملہ غاتا جاچ ءِ ہلنگا۔ پاکستانی سفیر سفارت خانہ نا ویب سائٹ اٹی ودکی فیچر درستی راستی کرفنگ، چھٹی نا دے قونصل خذمت آتا فراوانی، ایمبیسی ٹی کال وصول کروک آ مستعد عملہ نا تعیناتی و قونصل خانہ غاتے ٹی تروک آ خذمت آتا سرجم اٹ ذکر ءِ کرے۔ اوسفارت خانہ و قونصل خانہ غاتا خذمت آتیان فائدہ ہرفنگ و دابابت صارف آتا مثبت فیڈ بیک نا ہم ذکر ءِ کرے۔ پاکستانی کمیونٹی نا باسک و میڈیا نا نمائندہ غاک آسراتی تا فراوانی ٹی گچینی نا ستاءِ کریر۔
