2دے ئی کانفرنس قومی خبررساں ادارہ نا کنڈآن اینو بناء کیک، کانفرنس نا سرحال ’’پاکستان نامیڈیا:وارخواہی و چیلنجز‘‘ ءِ
کانفرنس آن خبررساں ادارہ غاتا نیام اٹ بامسخت کمکاری و خڑکی رابطہ غاتے مون آ دننگک، ایم ڈی اے پی پی
اسلام آباد۔ 12مئی (اے پی پی) خبررساں ادارہ غاتا 2دے ئی جہانی کانفرنس (آئی سی این اے) ٹی شرکت کن چندی ملک آتا مندوبین آتا بنجائی دارالحکومت آ بننگ نا چرجوئی برجاءِ کانفرنس 13 و 14مئی آ اڈ ہلیک۔ قومی خبررساں ادارہ ایسوسی ایٹڈ پریس آف پاکستان نا کنڈآن اڈ ہلوک آ داکانفرنس اٹی شرکت کن 12ملک آتیان 15مندوبین سرمسنو۔ کانفرنس ناسرحال’’پاکستان نامیڈیا:وارخواہی و چیلنجز‘‘ ءِ ہراٹی خبررساں ادارہ غاتے مون تروک کسبی چیلنج آتیا چکار کننگک۔ منیجنگ ڈائریکٹر اے پی پی مسعود ملک اسلام آباد آ بننگ آ مندوبین آتے بخیر اٹ پارے و اوفتے تون مختصر ہیت و گپ کرسا اومیت ظاہر کرے کہ کانفرنس اٹی مروک آ غوروخوض آن خبررساں ادارہ غاتا نیام اٹ بامسخت کمکاری ءِ مون آ دننگک۔ اوپارے کہ داکانفرنس صحافی تے مسابقانہ فضاء ٹی براہ راست رابطہ استوار کننگ اٹ کمکار مریک۔ پاکستان نا 70 می سال دے انا مناسبت آن اڈ ہلوک آ دا کانفرنس نامسخت مک انا جوڑجاڑی تشخص ءِ تالان کننگ و خبررساں ادارہ غاتا نیام اٹ اشتراک کار ءِ مون آ دننگ نا ءِ، داوخت اسکان چین ، انڈونیشیا، آذربائیجان ، ایران، رومانیہ ، اومان ، بلغاریہ ، ترکی ، لبنان ، سوڈان، تیونس و شام آن مندوبین آک سرمسنو وخت اس کہ ایلو ملک آتیان مندوبین آتا بننگ نا زوت گمان ءِ۔ داکانفرنس اقوام عالم اٹی ملک انا اعتدال پسند تشخص ءِ تالان کننگ اٹ کمکار مریک و داڑآن ساڑی مروک آتے ذرائع ابلاغ نا پڑ اٹ مون تروک چیلنج آتیا غور و حکمت عملی اس وضع کننگ نا موقع دوبریک۔ ڈیجیٹل کمیونیکیشن نا ساڑی آ دوراٹی قومی خبررساں ادارہ غاتا کڑد بھاز اہمیت اختیار کرینے انتئے کہ اسہ قوم اس ہم عالمگیریت نا چیلنج آتون مون تننگ کن جتا مننگ کپسہ۔ کانفرنس اٹی پاک۔چین اقتصادی راہداری (سی پیک) ، میڈیا رابطہ، خبررساں ادارہ غاتے آخبت نا چیلنج و ڈیجیٹل دور اٹی خبر رساں ادارہ غاتا کڑد و تین پہ تینی کمکاری نا سرحال آتیا اہم نشست اڈ ہلیک۔ چندی بشخ آتیان کلیدی ترانکارآک دااہم انگا سرحال آتیا اڈ ہلوک آ نشست آتے ٹی خیال آتا درشانی ءِ کیرہ۔ درملکی مندوبین آتے پاکستان نا امن نا کوشست آتا بارواٹ معلومدار کرسا پاننگک کہ ہراوڑ پاکستان دہشت گردی ناچیلنج آتا مون ءِ تورینے۔
