میڈیا نا دنیا تون تعلق تخوک آ ہرا بشخ ہلوک آک پاکستان آ بسنو، اوفتے آخبتی بنداو تیا اسہ ہندن ءُ پلیٹ فارم اس ٹہیفوئی مرے ہرا بروک آ دور انا خبری گرج آتے پبی وڑاٹ پیش کننگ کے، منیجنگ ڈائریکٹر اے پی پی مسعود ملک
اسلام آباد۔ 12مئی (اے پی پی) قومی خبررساں ادارہ ایسوسی ایٹڈ پریس آف پاکستان ’’اے پی پی‘‘ نا کنڈآن جہانی نیوز ایجنسیز کانفرنس ’’آئی سی این اے‘‘ نا بابت اسہ دیوان اسے نا اڈتننگ’’اے پی پی‘‘ نا ہیڈکوارٹر اٹ اڈ ہلک۔ہفتہ نا دے داڑے مروک آ دیوان اٹی کانفرنس نا اڈتننگ نا بابت بست وبند آتا بارواٹ ’’اے پی پی‘‘ نا ایگزیکٹو ڈائریکٹر محمد طاہر حسن، ڈائریکٹر نیوز اکرم ملک، ڈائریکٹر ڈپلومیٹک افیئرز قمر اللہ چوہدری و کمکار انٹرنل کمیٹیک سرجم رپورٹ پیش کریر۔ دیوان نا کماشی ءِ کرسا اے پی پی نا منیجنگ ڈائریکٹر مسعود ملک بست و بند آتا بابت است جمی نا درشانی ءِ کرسا اومیت ظاہر کرے کہ ’’آئی سی این اے‘‘ نا مسخت آتے دوئی کننگ کن ہرافارمیٹ ءِ ترتیب تننگانے، او کانفرنس ناسرحال آتا پورو احاطہ ءِ کیک و دابابت عملی گام گیج آتیا مبنی جامع لائحہ عمل ءِ مون آ دننگ اٹ کمکار جوڑ مریک۔ اوداہیت آ زور شاغاکہ میڈیا نا دنیا تون تعلق تخوک آ ہرابشخ ہلوک آک پاکستان آ بسنو، اوفتے آخبتی بنداو تیا اسہ ہندن ءُ پلیٹ فارم اس ٹہیفوئی مرے ہرا بروک آ دور انا خبری گرج آتے پبی وڑاٹ پیش کننگ کے۔ اوخبری رابطہ غاتے ٹی ساڑی آ عہدنا ترندی ءِ اسہ اہم ءُ مزل اسے نا نشان گوندسا پارے کہ آخبت اٹ دارابطہ غاتے ٹی پین ترندی و جامعیت نااشارہ ملنگ ءِ، ہراادارہ غاک داہدف آتے دوئی کننگ اٹ بے سہب مریرہ ، اومیڈیا نا دنیا ٹی تینا ساکھ ءِ گوہرہ ، مسابقت نا دادوڑاٹ مچ آ دنیا نا خبررساں ادارہ غاتا اہمیت مست آن زیات اہمیت اختیار کرینے۔ ’’اے پی پی‘‘ نا ایگزیکٹو ڈائریکٹر طاہر حسن دیوان نا بست وبند آتا بابت احوال ترسا پارے کہ کانفرنس نا بشخ ہلوک آتے گچین آسراتی تننگے و اِرا دے اسکان غٹ معاملہ غاتے براہ راست مانیٹر کننگک ۔ اواومیت ظاہر کرے کہ پاکستان نا 70 سالہ دود آتا بابت کانفرنس اسہ معتبر بابت یات گار جوڑ مریک و کانفرنس اٹی اوار چار جتا نشست آتاسرحال آک ساڑی آ عہد اٹی انفارمیشن نالمحہ بہ لمحہ بدلینگوک آ حالیت آتا پس و پیش منظر ءِ چاہنگ نا کسر ءِ آوار کیک۔ کانفرنس اٹی اوار سرحال آتا چار بنجائی نشست آتیان کلیدی ترانکار آک تران کیرہ۔
