اسلام آباد۔ 9 مئی (اے پی پی) مزن وزیرشاہد خاقان عباسی ءَ گوشت کہ چیئرمین نیب ءَ ھما رنگ ءَ چار ارب 90 کروڑ ڈالر بھارت ءَ روان دیگ ءِ یک ھالتاکی ھال ءِ بنیات ءَ پیسریگیں مزن وزیر ءِ ھلاپ ءَ پٹ ءُُ پول ءَ حکم داتگ، اے مئے واستہ نہ وشیں گپ اِت ءُُ دگنیا ءَ پاکستان ءِ بنامی ءِ سسب اِنت، اے المیں ایں ءُُ پکوئیں جیڈھ اِت ءُُ ایشی ءِ تہ ءَ ملک ءِ زرّآناں دژمن ملک ءَ روان دیگ ءِ بھتام اِنت، ایشی ءَ پٹ ءُُُ پول ءِ واستہ ھاسیں پارلیمانی کمیٹی جوڑ کنگ بہ بیت ءُُ ھما نیب ءِ چیرمین ءَ را لوٹ کنگ بہ بیت ءُُ اے جیڈھ ءِ بابت ءَ پٹ ءُُ پول کنگ ءُُ رپوٹ پیش کنگ بہ بیت تانکہ پاکستان ءِ الس ءِ دیم ءَ راستی بیا اَنت، اپوزیشن ءَ را آفر کتگ کہ نیب ءِ کانود ءِ ھما مٹ ءُُ بدلی آنی سر ءَ تپاک کنگ بوتگ آ ایوان ءِ دیم ءَ پیش کنگ بہ بنت ما ایشانی سر ءَ باست ءُُ واست کنگ ءِ واستہ تیار آں۔ مزن وزیر شاہد خاقان عباسی ءَ چار شمبے ءِ روچ ءَ راجی اسمبلی ءَ ھیالانی درشانی کنان ءَ گوشت کہ ایشی ءَ چہ پیسر ایوان ءِ توک ءُُ ڈن ءَ نیب ءِ سبب ءَ ملک ءِ توکی جاور کہ جوڑ بوھگ ءَ اَنت آ شر نہ بوھگ ءَ انت۔
