اسلام آباد۔ 09 مئی (اے پی پی) صدر مملکت ممنون حسین پارینے کہ اسٹریٹ چلڈرن ہم ننا جغر نا ٹکر ءِ و زند انا غٹ تر آسراتی تیا اونا ہم بریبر حق ءِ، داچناتے مون آ اتنگ کن مسلم ہینڈ انا خذمت آک ستاء کڑزرہ۔ صدر مملکت ممنون حسین داہیت ءِ فٹ بال نا جہانی مقابلہ غاتے ٹی بشخ ہلنگ کن مسلم ہینڈ انٹرنیشنل نا کنڈآن روس آ ہنوک آ اسٹریٹ چلڈرن نا ٹیم اتون ہیت وگپ کرسا پارے ۔ داوخت آ وزیر مملکت مذہبی امور پیر امین الحسنات شاہ و چیئرمین مسلم ہینڈ انٹرنیشنل سید لخت حسنین شاہ ئسک ہم ساڑی ئسر۔ صدر مملکت پارے کہ اسٹریٹ چلڈرن ءِ گوازی تے تون اوار زند انا چندی بشخ آتے ٹی بنجائی دنگ اٹ اوار کننگ نا چرجوئی ٹی مسلم ہینڈ انا خذمت آک ستاء کڑزرہ و داکوشست آک صدقہ جاریہ نا حیثیت تخرہ۔ اوپارے کہ اسہ جان جوڑ و شون ہلوک راج اسے نا ٹہیفنگ کن گوازی بھاز المی ءِ ہرانا مون آ دننگ کن کروک آ کوشست آک ستاء کڑزرہ۔صدر مملکت گوازی گر آتے پنت و شون کرے کہ او ہراتم گوازی نا پڑ اٹی دڑنگر تو تینے کس اسے آن کم ہلپس و تینا ملک انا عزت و بڑزی نا جوزہ ءِ مدام مون آ تخر۔ صدر مملکت گوازی گر آتے مستی پنت و شون کرے کہ او گوازی تون اوار اوار تعلیم آ ہم پورو چکار تخر انتئے کہ تعلیم ہی غٹ آن بھلا واکءِ ہرا قوم تے عروج و بڑزی عطاکیک۔ داوخت آ وزیر مملکت پیر امین الحسنات شاہ پارے کہ زند انا بھاز انگا نعمت آتیان محروم دا چناک سرسہبی نا جوزہ اتون روس آ ہِننگ ءُ نن اومیت کینہ کہ دا وطن آن مر وطن نا بیرک ءِ بڑز کرور و پدی برور۔
