اسلام آباد۔ 09 مئی (اے پی پی) اسپیکر قومی اسمبلی سردارایاز صادق تون چارشنبے نادے پارلیمنٹ ہاؤس اٹی جاپان نا سفیر تکاشی کیورئی اوڑدہی کرے ہراٹی ہڑتوم آ کنڈآتا تعلقداری تتون اوار تین پہ تینی است خواہی نا معاملہ غاتیا خیال آتا درشانی ءِ کننگا۔ داوخت آ اسپیکر قومی اسمبلی پارے کہ پاکستان جاپان تون تینا پارلیمانی و سفارتی تعلقداری تے بھاز قدر انا نظر اٹ ہرک۔ پاکستان جاپان تون علاقائی شونداری تون اوار ایلو غٹ بشخ آتے ٹی کمکاری ءِ مون آ دننگ نا خواہندار ءِ۔ اوپارے کہ علاقائی امن کن پاکستانی قوم دہشت گردی نا برخلاف بے شمار قربانی تسنے۔ دہشت گردی و انتہاء پسندی ڈیہہ نا شونداری نا کسر اٹ غٹ آن بھلا اڑاند ءِ۔ جاپانی سفیر پارے کہ جاپان پاکستان تون تینا تعلقداری تے پین مون آ دننگ نا خواہندار ءِ۔ اوپارے کہ علاقائی شونداری کن ڈیہہ نا غٹ ملک آتے اسیجائی اٹ کوشست کننگ نا گرج ءِ۔ جاپانی سفیر پارے کہ پاکستانی قوم انا دہشت گردی نا برخلاف جاری جنگ ءِ قدر انا نظر اٹ ہرک و دا جنگ اٹی پاکستان نا کنڈآن تروک آ قربانی تا ستاءِ کیک۔
