اسلام آباد۔ 09 مئی (اے پی پی) ڈپٹی چیئرمین پلاننگ کمیشن سرتاج عزیز پارینے کہ حکومت خور و کشت وکشار ، آبی وسیلہ و فزیکل پلاننگ اینڈ ہاؤسنگ نا بشخ آتیا خصوصی چکار کننگ ءِ ، پلاننگ کمیشن دا بابت ملک اٹی دابشخ آتا گچینی کن اسہ مربوط ءُ ڈٹ بندی اس کرینے ہراڑآن لس شاری ءِ فائدہ رسینگک۔ داخیال آتا درشانی ءِ او تدوک آ دے سنٹرل ڈویلپمنٹ ورکنگ پارٹی نا دیوان آن تران کرسا کرے۔ دیوان اٹی خور و کشت و کشار نا اِرا ڈٹ پیش کننگا ہراٹی اولیکو ڈٹ 79 کروڑ 93لکھ 67 ہزار روپئی نا خڑچ انا پیش کننگا وخت اس کہ ارٹ میکو ڈٹ 2ارب 50 کروڑ روپئی نا خڑچ انا پیش کننگا۔ ہڑتوم آ ڈٹ آتے دیوان اٹ منظور کننگا۔ ہنداوڑدیوان اٹی آبی وسیلہ نا بشخ اٹی فتح جنگ اٹی کسانہ ڈیم انا جوڑ جاڑ نا پیش کننگا ہرانا کل خڑچ 2 ارب 62کروڑ 94لکھ 2 ہزار روپئی پیش کننگا ہرادے دیوان اٹ منظور کریر۔ سویلی وزیرستان اٹی شکئی ڈیم انا جوڑ جاڑ کن 90 کروڑ 8 لکھ روپئی نا پیش کننگا ہرادے دیوان اٹ منظور کننگا۔ سندھ انا بیراج آتا جوڑ جاڑ و شونداری و سکھر بیراج ءِ پوسکن آ ٹیکنالوجی ٹی شاغنگ کن 17 ارب 90 کروڑ 89 لکھ روپئی نا ڈٹ پیش کننگا ہرادے دیوان گڈیکو منظوری کن ایکنک آ گدریفے۔ ہندا وڑ دیوان اٹی فزیکل پلاننگ اینڈ ہاؤسنگ نا رداٹ اوغان پیکج نا رداٹ اوغانستان نا 2شار کابل و لوگر اٹی ہسپتال آتا جوڑ جاڑ و شونداری کن 54 کروڑ 47 لکھ 96 ہزار روپئی نا خڑچ انا پیش کننگا ہرادے دیوان اٹ منظور کریر۔
