اسلام آباد۔ 10 نومبر (اے پی پی) وزیراعظم نا کنڈآن شاری و خلقی علاقہ غاتیٹی لوڈشیڈنگ نا وخت ئُ پاس ئِ کم کننگ کن کروک آ پارت آتیا عملدرآمد نا بنامسنے۔ وزارت دیر و بجلی نا ذرائع نا رداٹ شاری علاقہ غاتیٹی مسہ گھنٹہ و خلقی آ علاقہ غاتیٹی چار گھنٹہ لوڈمینجمنٹ نا کننگ انگ ئِ۔ سسٹم اٹی بجلی نا ودکی پیداوار اوار مننگ آن گڈ حالیت آتیٹی نمان گچینی بسنے۔ جنوری 2012 ءٹی لوڈشیڈنگ نا وخت ئُ پاس شاری علاقہ غاتیٹی 8گھنٹہ و خلقی آ علاقہ غاتیٹی 10آن 12گھنٹہ ئس ولے ساڑی آ حکومت نا برسراقتدار بننگ آن گڈ لوڈشیڈنگ نا وخت ئُ پاس اٹی نمان کمتی بسنے و شاری علاقہ غاتیٹی 6گھنٹہ و خلقی آ علاقہ غاتیٹی 8گھنٹہ اسکان لوڈشیڈنگ اسکان اتنگا۔ داسہ وزیراعظم نا پارت نار داٹ اوٹی پین کمتی کننگانے و شاری علاقہ غاتیٹی 3گھنٹہ و خلقی علاقہ غاتیٹی 4گھنٹہ نا لوڈشیڈنگ کننگانے۔ غٹ ڈسٹری بیوشن کمپنی تے پارت کننگانے کہ پوسکن آ لوڈمینجمنٹ پلان آ سختی اٹ عمل کننگے، و سلوک آ پیسہ غاتا وصولی و بجلی دُزی نا توننگ کن خصوصی گام گیج کننگے تانکہ لوڈشیڈنگ نا وخت ئُ پاس اٹی پین کمتی اتنگ مرے۔
