اسلام آباد۔ 09 نومبر (اے پی پی) صدر مملکت ممنون حسین و وزیراعظم محمد نواز شریف پارینے کہ حکومت شونداری ایجنڈہ آن تینا توجوہ ئِ اسہ پلوکپک و ملک انا شون و الس نا زند انا آب اٹی گچینی کن شونداری ڈٹ آتے پورو کننگ کن تندہی اٹ کاریم کرسا کیک۔ او داہیتئِ چارشنبے آ ایوان صدر اٹی مروک آ اوڑدہی ٹی پارے ۔ وزیراعظم محمد نواز شریف نا صدر مملکت تون مروک آ اوڑدہی ٹی ہڑتوم آ راہشونک ملک انا جم انگا حالیت و اہم قومی معاملہ غاتیا ہیت وگپ کریر۔ ایوان صدر نا کنڈآن جاری بیان نا رداٹ اوڑدہی ٹی پاک چین اقتصادی راہداری ، توانائی نا ڈٹ، امن و ایمنی ، لین آف کنٹرول و مقبوضہ کشمیر نا ورکنگ باﺅنڈری آ ودی مروک آ حالیت آتون اوار غٹ معاملہ غاتیا درشانِ خیال کننگا۔ وزیراعظم صدر مملکت ئِ حکومت نا کنڈآن اقتصادی و السی شرحالی نا رداٹ کروک آ گام گیج آتیان معلومدار کرے۔ صدر مملکت حکومت نا معاشی پالیسی تا ستائِ کرسا پارے کہ دا پالیسی تا سوب قومی معیشت سوگو مسنے و اونا زئم آک لس بندغ اسکان سرمننگ ئُ۔ صدر مملکت پاکستان نا اقتصادی حالیت آتا گچینی نا بابت بین الاقوامی مالیاتی ادارہ غاتا رپورٹ آ است جمی نا درشانی ئِ کرے۔ صدر مملکت و وزیراعظم پاک چین اقتصادی راہداری نا جوڑ جاڑ نا رفتار آ است جمی نا درشانی ئِ کرسا پارے کہ داڈٹ نہ صرف پاکستان بلکن مچ آ ڈیہہ کن مفید ثابت مریک۔ ہڑتوم آ راہشونک داعزم انا درشانی ئِ کریر کہ پاک چین اقتصادی راہداری نا عظیم الشان ڈٹ آن غٹ صوبہ و ڈیہہ ئِ اسہ وڑفائدہ دوئی مریک۔ ہڑتوم آ راہشونک داہیت آ است جمی نا درشانی ئِ کریر کہ سی پیک ڈٹ انا رداٹ توانائی ڈٹ آتا بروخت پوروی آن ملک اٹی 2018ءاسکان لوڈشیڈنگ چٹک۔ صدر مملکت و وزیراعظم آپریشن ضرب عضب نا وخت آ دوئی مروک آ سرسہبی تا است جمی نا درشانی ئِ کرسا پارے کہ ملک اٹی آخریکو دہشت گرد انا چٹفنگ اسکان دا آپریشن برجاءسلک۔ ہڑتوم آ راہشونک دہشت گردی و انتہاپسندی تون مون تننگ کن سلہہ بند فوج و کانود نافذ کروک آ ادارہ غاتا افسر و ورناتا قربانی تے خراج تحسین پیش کیر و دا عزم انا درشانی ئِ کریر کہ ملک انا غٹ بشخ آتیٹی پورو امن نا بحالی کن دا آپریشن برجاءسلک۔ داوخت آ ڈیہہ نا حالیت آتا ہم جاچ ئِ ہلنگاو ہڑتوم آ راہشونک ڈیہہ ٹی ہمسایہ ملک آتون دوستانہ تعلقداری تا خواہش نا درشانی ئِ ہم کریر۔ اوڑدہی ٹی ہڑتوم آ راہشون تا کنڈآن مقبوضہ کشمیر اٹی جاری بیدادی نا ترندی اٹ مذمت کننگا۔ او فک بین الاقوامی برادری آ زورشاغار کہ او کشمیر نا ویل ئِ اقوام متحدہ نا قرارداد آتا رداٹ ایسر کرفنگ اٹی تینا کڑد ئِ ادا کیر۔
