اسلام آباد۔ 08نومبر (اے پی پی) اسپیکر قومی اسمبلی سردار ایاز صادق پارینے کہ حکیم الامت علامہ محمد اقبال نا کلہو عالم گیر ئِ و اونا شاعری راج انا غٹ تپہ غاتا عکاسی ئِ کیک۔ اقبال نا تعلیم آتیٹی امت ئِ مون تروک ویل آتا ایسری ساڑی ئِ۔ داخیال آتا درشانی ئِ او علامہ اقبال نا 139می یوم پیدائش نا وخت آ تینا کلہو اٹی کرے ہرا ہرسال 9نومبر آ مچ آ ملک اٹی شان و شرف اٹ اڈتننگک۔ اسپیکر پارے کہ علامہ اقبال نا فلسفہ و شاعری جتا وطن نا دوئی کن برصغیر نا مسلمان تا رائے ئِ ہموار کننگ اٹی اہم کڑد ادا کرے و جہد آجوئی ئِ اسہ پبی تحریک اٹی بدل کرے ہرانا نتیجہ ٹی 23مارچ 1940ءآ قرارداد پاکستان منظور مس ہرادے برصغیر پاک و ہند اٹی رہینگوک آ مسلمان تا پبی تائید دوئی ئس۔ اسپیکر پارے کہ علامہ اقبال نا تغ مسلمانان برصغیر کن اسہ نعمت اسے آن کم ہلوکہ ، اونا شاعری مسلمان تیٹی جتا وطن نا دوئی ، ہراڑے او تینا مذہب ، دودوربیدہ و روایت آتا رداٹ زند ئِ تدیفر، کن پوسکن آ جوزہ و ولولہ ودی کرے۔
