اسلام آباد۔ 08نومبر (اے پی پی) پاکستان مسلم لیگ (ن) نا راہشون عمر ایوب پارینے کہ پاک چین اقتصادی راہداری ڈٹ انا پوروی آن بلوچستان، سندھ ، خیبرپختونخوا و پنجاب نا الس مستفید مریک۔ تدوک آ دے ریڈیو پاکستان تون ہیت و گپ کرسا اوپارے کہ پاکستان نا شون اٹی پاک چین اقتصادی راہداری ڈٹ آن مست فیلڈ مارشل ایوب خان امریکہ نا مخالفت ئِ باوجود قراقرم ہائی وے جوڑ جاڑ کرسا پاک چین سنگتی ئِ بے مثال جوڑ کرے ولے ساڑی آ حکومت نا گچین پالیسی تیان پاک چین اقتصادی راہداری ڈٹ انا بناءکننگانے ہرانا پوروی آن پاکستان تون اوار ڈیہہ نا قسمت بدل مریک ۔ اوپارے کہ دا ڈٹ اتون ذیلی ڈٹ آتیٹی روڈ، ریلوے ٹریک و موٹروے جوڑجاڑ کننگک ہراڑآن روزگار نا وارخواہی ودی مریک۔ عمر ایوب پارے کہ چین افریقہ ٹی معدنیات و انفراسٹرکچر نا مد اٹی 6سد ارب ڈالر آن زیات نا زرکاری کننگ ئِ و دا معدنیات آتے پاکستان نا کمک اٹ چین آ دیک۔ گوادر آن 50کنٹینر آتا اولیکو کھیپ چین آ رادہ مننگ نا بابت چست کروک آ سوج انا ورندی ئِ ترسا اوپارے کہ کنٹینر آتا اولیکو کھیپ چین آ رادہ مننگ خوش آئند ئِ ولے بروک آ دے تیٹی چین نا مال بردار بحری جہاز گوادر اٹی لنگرانداز مننگ والائِ ہراٹی 20فٹ انا 18ہزار کنٹینر ئُ ، داکنٹینر آتا لین اس خلنگے تو 70آن 75میل مریس مرغن ٹرین اس جوڑ مریک ۔ عمر ایوب پارے کہ چین آن ہر تو اگہ مسہ مال بردار بحری جہاز گوادر پورٹ آ لنگر اندازمریر تو 50ہزار آن زیات کنٹینر روڈ آتیا راہی روان مریرہ ہراڑآن مچ آ ملک اٹی شونہالی بریک ۔
