پاکستان اٹی اقتصادی و دفاعی پٹ اٹی شون مسلم لیگ (ن) نا دور اٹی ہی مسنے
اقوام متحدہ تون اوار ہر فورم آکشمیر نا ویل ئِ گچین وڑاٹ تالان کرے
نڑھ، کہوٹہ۔ 04نومبر (اے پی پی) وزیراعظم محمد نواز شریف پارینے کہ پاکستان اٹی اقتصادی و دفاعی پٹ اٹی شون مسلم لیگ (ن) نا دور اٹی ہی مسنے، پدریسہ دروغ تڑوک آک و بے زیب زبان کاریم اٹ اتوک آک وخت اس ہم پاکستانی الس نا راہشون مننگ کپسہ، پاکستان شون و شونہالی نا کسر آ روان ئِ، مخالفین آتے شون، ہضم مفننگ ئِ و او اونا کسر اٹی اڑاند شاغنگ ئُ ولے شون نا پہیہ ئِ توروک آتے الس مسترد کرینے۔ داخیال آتا درشانی ئِ او جمعہ آ نڑھ ، کہوٹہ ٹی اسہ بھلو السی جلسہ سے آن تران کرسا کرے۔ جلسہ آن پاکستان مسلم لیگ (ن) نا چیئرمین راجہ ظفرالحق ، بنجائی وزیر پٹرولیم و قدرتی وسیلہ شاہد خاقان عباسی و صوبائی وزیر راجہ اشفاق سرور ہم تران کریر۔ وزیراعظم تحصیل ہیڈکوارٹرہسپتال ئِ پوسکن جوڑ کننگ، 12اسکول آتے ہائیر سیکنڈری اسکول نا درجہ تننگ، کہوٹہ روڈ ئِ اِرا رویہ کننگ، کہوٹہ۔کلرسیداں ٹی 100کلومیٹر روڈ آتا جوڑ جاڑ کن فنڈز انا فراوانی نا پڑو ئِ کرے۔ وزیراعظم پارے کہ پاکستان مسلم لیگ (ن) تینا ہر دور حکومت اٹی زند انا ہر بشخ ئِ شون تسنے، تینا مسکوہی دورِ حکومت اٹی ایٹمی دھماکہ کرسا ملکی دفاع ئِ ناقابل تسخیر جوڑ کرے، شون و شونہالی کن موٹرویز جوڑ جاڑ کننگا۔ اوپارے کہ ہراتم نن اقتدار ئِ سنبھالان تو ملک ئِ معاشی مشکلات ، توانائی نا کاختی و دہشت گردی نا چیلنج آتا مون تروکی ئس ہراڑآ دمدستی توجوہ نا گرج ئس۔ اوپارے کہ نن بجلی و گیس انا ڈٹ آتابنائِ کرین تانکہ ملک آن تونائی نا کاختی مر مرے۔ وزیراعظم پارے کہ بنداوی ڈھانچہ نا شون آ خصوصی توجوہ تننگ انگ ئِ ، گوادر آن خنجراب اسکان شاہرات جوڑ جاڑ کننگ انگ ئِ ہراڑآن مچ آ ملک انا الس ئِ فائدہ مریک ۔ اوپارے کہ نڑھ انا علاقہ زیباانگا علاقہ ئِ ، خواہش ئِ کہ داڑے سیل و سوات ئِ مون آ دننگے و خلقت آک مری و ایلو سیل و سواتی ہند آتیانبار داعلاقہ نا سیل و سوات کن ہم بریر۔ اوپارے کہ زیباانگا علاقہ غانبار داجاگہ نا خلقت آک ہم بھاز جوا ن ئُ۔ اوپارے کہ پاکستانی خلقت آک سچائُ، دروغ تڑوک آ اوفتا راہشون مننگ کپک، سرعام دستار ئِ شیف بڑز کروک آ راہشون مننگ کپک، نازیبا زبان استعمال کروک آ اوفتا راہشون مننگ کپک۔ اوپارے کہ ای داعلاقہ ئِ سلام پیش کیوہ ۔ اوپارے کہ پاکستان شون ہلنگ ئِ ، نڑھ و کہوٹہ کون آ علاقہ ہم شون ہلنگ ئِ، مخالفین آتے معلوم ئِ کہ علاقہ ٹی بجلی و گیس انا فراوانی و اِرا رویہ خوبصورت ایکسپریس وے جوڑ مننگ آن علاقہ ٹی شون و شونہالی بریک، ہنداخاطران او فک اڑاند ودی کننگ ئُ ہرا شونہالی نا کسر ئِ توننگ خوارہ۔ اوپارے کہ پاکستان اٹی شون صرف مسلم لیگ (ن) نا دور اٹی مس۔ اوپارے کہ شون نا سفرزوروشور اٹ جاری سلک، شون نا پہیہ ئِ توروک آک سرسہب مفسہ ہرافتے الس مستردکرینے ومخالفینک شیشہ ٹی تینا چہرہ ئِ ہم ہرانو۔ اوپارے کہ نن خواری و دیانتداری اٹ کاریم کننگ اُن، ہچ گہس ننے آ تینا دوتے بڑز کننگ کپک نن پروجیکٹ آتیٹی پیسہ یا کمیشن ہلتنون۔ اوپارے کہ بے روزگاری نا چٹفنگ کنا اولین اولیت ئِ، نن دہشت گردی نا مخ ئِ پرغانن، طالب علم آتے گچین تعلیمی آسراتی تتون لیپ ٹاپ تننگ اُن، داچرجوئی ٹی ارب آ روپئی نا وظیفہ ہم تننگ انگ ئِ۔ اوپارے کہ نیزگار تا درمان کن ہسپتال اڈ تننگ انگ ئِ، ریلوے ئِ جوان کننگانے، حاجی صاحب آک ہرافتے مست وڑوڑنا مشکلات آتا مون تروکی ئس داسہ اوفتے تون وی آئی پی برتاﺅکننگ انگ ئِ ۔ اوپارے کہ نڑھ انا اسلام آباد آن سفر مسہ گھنٹہ آن کم کرسا اسہ گھنٹہ ٹی اتنگ کن گچین شاہراہ جوڑ جاڑ کننگ و داڑکن مش تیٹی سرنگ جوڑ جاڑ کننگک۔ اوپارے کہ خنجراب آن گوادر اسکان گچین شاہراہ جوڑ جاڑ کننگ انگ ئِ ہراڑآن پاکستان و چین نا واپار اٹی ودکی مریک، و چین نا واپاری گڑاک براستہ پاکستان پیشن نا منڈی و یورپ اسکان کاہک۔ اوپارے کہ پاکستان اٹی بجلی و گیس انا ڈٹ آتیا کاریم مننگ ئِ ، مست 16و18گھنٹہ اسکان لوڈ شیڈنگ مسکہ، مسکوہی نا حکومت آک لوڈشیڈنگ نا چٹفنگ کن ہچ ئُ کاریم اس کتوس۔ اوپارے کہ مخالفین تا ایجنڈہ شون نا ایجنڈہ اف، داسہ لوڈشیڈنگ کم مسنے، دا مچ آ علاقہ ٹی گیس و بجلی بریک۔ وزیراعظم پارے کہ مسلم لیگ (ن) کشمیر نا ویل آ ہمیشہ ڈٹ کر ہیت کرینے، ای اقوام متحدہ تون اوار ہر فورم آ کشمیر نا ویل ئِ گچین وڑاٹ تالان کریٹ۔ وزیراعظم راجہ ظفرالحق و شاہد خاقان عباسی ئِ خراج تحسین پیش کرے ہراک داعلاقہ نا جوڑ جاڑ و شون اکن کاریم کریر۔ اوپارے کہ ای و شاہد خاقان عباسی 14تو جیل کاٹان، ننا انت قصور اس ئس؟ ننے اٹک قلعہ ٹی تخنگا۔ اوپارے کہ ننا عزم ئِ نزور کننگ مفک، الس وار وار مسلم لیگ (ن) ئِ ملک انا شون نا موقع ترسا کیک۔ اوپارے کہ پاکستان اٹی شون مننگ ئِ و داکاریم اٹی غٹ بایدے دوسبک ئِ کیر، موٹروے جوڑ مننگ ئِ، روڈ آک جوڑ مننگ ئُ، گیس بننگ ئِ۔ وزیراعظم علاقہ نا شون اکن پڑو آتے کرسا پارے کہ داڑے زیباشاہراہ جوڑ جاڑ کننگک، کہوٹہ تحصیل و کلرسیداں نا غٹ یونین کونسل آتے گیس و بجلی فراوان کننگک، کہوٹہ نا تحصیل ہیڈکوارٹر ہسپتال ئِ پوسکن جوڑ کننگک ہراڑ ے درمان نا غٹ آسراتی دوبریک، 12اسکول آتا درجہ ئِ ودفسا ہائیر سیکنڈری اسکول کننگک، داڑے مسن تے کن کالج اڈتننگ خوانہ، کہوٹہ و کلرسیداں ٹی 100 کلو میٹر روڈ آتا جوڑ جاڑ کن فنڈز فراوان کننگک، اوپارے کہ داڈٹ آتیا ارب آ روپئی خڑچ بریک ہراڑآن علاقہ ٹی بھلو شون اس مریک و پسماندگی چٹک۔ وزیراعظم جلسہ ٹی زالبول نا شرکت نا ہم ستا ئِ کرے۔ داکان مست پاکستان مسلم لیگ (ن) نا چیئرمین راجہ ظفرالحق پارے کہ اینو کہوٹہ نا الس وزیراعظم محمد نواز شریف نا والہانہ استقبال ئِ کرینے دا علاقہ شہید آتا علاقہ ئِ و ہراتم وعدہ کینہ تو تینا جان تے ہم قربان کینہ۔ اوپارے کہ دنیا ٹی بے شمار سیاستدان ارے ولے مسہ وار وزیراعظم گچین مننگ آ اعزاز وزیراعظم محمد نوازشریف ئِ ہی دوئی ئِ، محمد نواز شریف ئِ اولیکو دور تیٹی مد ئِ پورو کننگ کن ہلنگ تو، ولدا ہم او صبر و تحمل و وضع داری نا سیاست ئِ اولیت تس، تنقید برائے تنقید نا پرواہ ئِ کننگ آن بیدس ملکی شون و السی شونہالی نا ایجنڈہ غا ترندی اٹ عمل کننگ اُن۔ اوپارے کہ وزیراعلیٰ پنجاب محمد شہباز شریف کہوٹہ نا کیہی علاقہ غاتا جوڑ جاڑ و شون اکن بے شمار فنڈز فراوان کرینے۔ اوپارے کہ پیشن نا واک آک اگہ پاک چین اقتصادی راہداری ڈٹ انا برخلاف ہیت یا سازش کیرہ تو او اوفتا ایجنڈہ نا بشخ ئِ ولے پاکستان نا تہٹی سی پیک نا برخلاف ہیت مرے تو او اوفتا ایجنڈہ ئِ انت پاہک۔ بنجائی وزیر پٹرولیم و قدرتی وسیلہ شاہد خاقان عباسی پارے کہ اینو نڑھ اٹی تاریخی ئُ دے اسے، داڑے ہمووزیراعظم ننا نیام اٹی ئِ ہرا پاکستان نا دفاعئِ ناقابل تسخیر جوڑ کرے، توانائی تنکی تون اوار غٹ چیلنج آتا مون ئِ تورینے۔ داکا ن مست وزیراعظم جلسہ گاہ آ سرمس تو شرکاءجھک سلسا والہانہ استقبال کریر و فلک شگاف نعرہ خلکر۔
