عملہ ئِ ڈیوٹی آ ساڑی مننگ نا پارت
اسلام آباد۔ 01نومبر (اے پی پی) اسلام آباد اٹی پاکستان تحریک انصاف نا دھرنہ غاتے ہرسا سرکاری ہسپتال آتیٹی ایمرجنسی نافذ کننگانے۔ نجی ٹی وی چینل ضلعی انتظامیہ نا بابت آن پارینے کہ اسلام آباد اٹی پاکستان تحریک انصاف نا دھرنہ نا پیش نظرپاکستان میڈیکل کمپلیکس (پمز) و پولی کلینک ہسپتال آتیٹی ایمرجنسی نافذ کرسا دوائی تا کچ اٹی ودکی کننگانے۔ ہسپتال آتیٹی ایمرجنسی ڈیپارٹمنٹ ئِ ہائی الرٹ کننگانے، سینئر ڈاکٹرز آتے ہسپتال آتیٹی ساڑی گری ئِ باوری جوڑ کننگ نا پارت کننگانے۔ بھلو کچ اسے ٹی بلڈ بیگز نا بست و بند کننگانے وخت اس کہ ہڑتوم آ ہسپتال آتیٹی 200کٹ آتے خورک تخنگانے، پولیس لین اٹی ہم پولیس کن خصوصی 15بیڈ انا ہسپتال اس تیار کرسا فعال کننگانے۔ پولی کلینک ہسپتال نا شعبہ انتقال خون نا سروک ڈاکٹر شریف استوری نا پاننگ ئِ کہ دھرنہ نا وخت ناخوشگوار یا ایمرجنسی نا حالیت آتون مون تننگ کن پولی کلینک ہسپتال ئِ پوروی وڑاٹ الرٹ تخنگانے۔ ہسپتال نا بلڈ بینک اٹی 300آن زیات دترنا تھیلہ تخنگانے وخت اس کہ 100 بیڈ ئِ خور ک کننگانے، فارمیسی ٹی معمول آن 4گنازیات دوائی اسٹاک کننگانے و غٹ سینئر ڈاکٹر ز آتون اوار عملہ ئِ ڈیوٹی آ ساڑی مننگ نا پارت کننگانے۔ پمز ہسپتال نا وائس چانسلر ڈاکٹر جاوید اکرام پارے کہ ہسپتال انتظامیہ ہسپتال اٹی کنٹرول روم اس اڈ تسنے، سینئر ڈاکٹرز آتون اوار غٹ عملہ ئِ پارت کرینے کہ دادے تیٹی ہسپتال اٹی ساڑی گری ئِ باوری جوڑ کیر۔ ہسپتال اٹی دترنا 500بیگ و 100 بیڈ انا ہم بست و بند کننگانے۔
