اسلام آباد۔ 01نومبر (اے پی پی) پاکستان مسلم لیگ(ن) نا راہشون و باسک قومی اسمبلی طلال چوہدری پارینے کہ عمران خان تون ثبوت مسکہ تو عدالت عظمیٰ نا مون آ پیش مسکہ۔ سے شنبے آ سپریم کورٹ نا پیشن میڈیا تون ہیت وگپ کرسا اوپارے کہ پاکستان تحریک انصاف نا شورغل عدالت آن تینا مرضی نا فیصلہ ہلنگ کن ئِ۔ اوپارے کہ عمران خان ہرروز کاغد آتے ہرفک ولے ہراتم عدالت اودے خواہک تو پیش مفک۔ اوپارے کہ عدالت نا مون آ پیش مفننگ نا مطلب ئِ کہ اوڑتون ثبوت اف۔ طلال چوہدری پارے کہ پی ٹی آئی نا وزیر آن شراب و غیرممنوعہ سلہہ غاتا دوئی مننگ و اسہ صوبائی وزیراعلیٰ اسے نا کنڈآن بنجاءآ جلہو نا کوشست نا مثال تاریخ اٹی ہم ملپک۔ اوپارے کہ وزیراعظم محمد نواز شریف تینا خاہوت تون اوار تینے احتساب کن پیش کرینے وخت اس کہ عمران خان احتساب آن نرنگ اٹی ئِ۔ اوپارے کہ عمران خان ئِ الیکشن کمیشن منی لانڈرنگ ، خراج دزی و بے پورو دستاویز ات جمع کرفنگ نا چرجوئی ٹی بٹنگانے۔ باسک قومی اسمبلی پارے کہ حکومت احتساب نا پن آ برانز کننگ ناموکل تفک۔ پٹنگ ناخلیس آن دز دز نا شور کننگ درست ئُ عمل اس اف۔ اوپارے کہ وزیر اس مرے یا وزیراعلیٰ اس کانود ناپاسداری کرسا اسلام آباد آ برے تو اودے پروٹوکول تننگک و اگہ غنڈاگردی نا نیت اٹ بریک تو اوڑتون ہمووڑ سلوک کننگک۔
