اسلام آباد۔ 01نومبر (اے پی پی) پاکستان مسلم لیگ(ن) نا راہشون و وزیردفاع خواجہ آصف پارینے کہ ننے عدالت عظمیٰ غا پت ئِ۔ سے شنبے آ سپریم کورٹ نا پیشن میڈیا تون ہیت وگپ کرسا اوپارے کہ شش تو مست نن عدالت عظمیٰ ئِ دا معاملہ غا کمیشن اس جوڑ کننگ کن درخواست اس تسوسن دا کمیشن ننا درخواست نا تائید مریک۔ خواجہ آصف پارے کہ ننے عدالتی فیصلہ غاتا پورو شرف ئِ آئین ننے داہیل ایتک کہ آئین ، جج صاحبان و اوفتا فیصلہ غاتا شرف ئِ کننگے۔ اوپارے کہ اینو یکم نومبر آ عدالت عظمیٰ صفا کلہو اس تسنے کہ ہندا تنازع نا بایدے فیصلہ مرے ولے اوکان گڈ برانز نا جواز اس پین سلپک۔ وزیر دفاع پارے کہ سپریم کورٹ اٹی ہڑتوم آ کڑدہ غاک ساڑی ئُ و داڑے شوکت خانم ہسپتال و آف شور کمپنی تا بارواٹی حق آک مون آ بریرہ ، غٹ ڈرائی کلین مرسا پیش تمرہ۔ اوپارے کہ انصاف نا دوئی کن عدالت عظمیٰ ٹی پیش مسنے، قوم ئِ برانزی سیاست آن بایدے نجات ملے۔
