اسلام آباد۔ 01نومبر (اے پی پی) پاکستان مسلم لیگ)(ن) نا سینیٹر و چیف آرگنائزر شعبہ خواتین بیگم نزہت صادق پارینے کہ اسلام آباد ئِ بند کننگ ناہیت کروک آک ملک و الس نا خیر خواہ افس، تینا ذاتی مفاد کن سیاست کروک آتا دوٹی بیدس مایوسی آن ہچس بفک، اوپارے کہ قائد محمد نواز شریف نا سیاست نا محور ملک و الس نا شرحالی ئِ ، ہمیشہ شرافت نا سیاست کرے، تحریک انصاف نا قائد عمران خان آمبارکرینگ نا سیاست ئِ مون آ دتنے۔ تینا بیان اٹی بیگم نزہت صادق مستی پارے کہ وخت انا گرج ئِ کہ غٹ سیاسی جماعت آک داوخت پورو یکجہتی نا درشانی ئِ کیر، داوخت ملک اٹی دھرنہ و افراتفری ودی کننگ آن پاکستان نا دشمن تے فائدہ مریک، غٹ آن مست پاکستا ن نا سالمیت و سوگوی نا بارواٹی سجفوئی مرے، ملک قائم سلک تو سیاست ہم مریک۔ مسلم لیگی راہشون پارے کہ سی پیک ڈٹ آن بھارت خوفزدہ ئِ و ہنداخاطران نہ صرف دہشت گرد آتا پشت پناہی ئِ کننگ ئِ بلکن سیم تیا بلاجواز سم کاری ہم کننگ ئِ تانکہ ارب آڈالرنا دا ڈٹئِ لتاڑنگے، ننا سلہہ بند فوج ، رینجرز ، پولیس و ایلو سیکورٹی ناادارہ غاک دہشت گرد آتا مقابلہ کریر، مچ آ قوم اودے قدر انا نظر اٹ ہرک۔ او غٹ سیاسی جماعت آتا سرکڑدہ غاتون پارے کہ ملکی سوگوی نا خاطر داوخت یکجہتی نا درشانی ئِ کننگے و دشمن ئِ موقع تننگپ۔
