اسلام آباد۔ 01نومبر (اے پی پی) بنجائی وزیر ڈٹ بندی و شون احسن اقبال پارینے کہ سیاسی نزوری نا سوب ملک ئِ بھلو نسخان اس مس، وژن 2025 ءنا رداٹ تعلیم ئِ بھاز اہمیت تننگانے، پی ایچ ڈی طالب علم آتے کن حکومت کیہی گام گیج کرینے، شون اکن معیشت تون بڑزکو تعلیم نااہمیت ہم بھاز المی ئِ۔ داخیال آتا درشانی ئِ او سے شنبے آ ہائر ایجوکیشن کمیشن(ایچ ای سی) ٹی وژن 2025ءنا دود آن تران کرسا کرے۔ بنجائی وزیر پارے کہ بروک آ دہ سال اٹی ہندن ئُ تعلیمی نظام اس جوڑ کننگے ہرا ایشیاٹی گچین مریک۔ سائنس مضمون آتون اوار آرٹ انا تعلیم ہم المی ئِ تانکہ طالب علم آتیٹی تخلیقی لائخی تے تالان کننگ مرے۔ اوپارے کہ پاکستان امریکہ نالج کوریڈور نا رداٹ بروک آ دہ سال اٹی 10ہزار پی ایچ ڈیز تیار کننگک۔ اوپارے کہ سی پیک اکنامک گیم چینجر اسے و پاک یو ایس نالج کوریڈور سٹریٹجک گیم چینجراس ثابت مریک۔ بنجائی وزیر پارے کہ پاکستان نا ہر ضلع ٹی یونیورسٹی نا اڈتننگ آن پسماندہ علاقہ غاتیٹی رہینگوک آ ک بڑزکو تعلیم دوئی کننگ کیرہ، حکومت مسہ سال اٹی ایچ ای سی نا بجٹ ئِ 100بلین آن 215بلین کرینے۔ اوپارے کہ پاکستان سیاسی نزوری و پالیسی تیٹی تسلسل مفننگ نا سوب بھلو قیمت اس اداکرینے۔ احسن اقبال مستی پارے کہ کاپی پیسٹ علم آن پیش تمسا ایجادو تخلیقی ئِ تینا کروئی مریک، 2016ءنا پاکستان 2013ءنا پاکستان آن جوان ئِ۔ مچ آ دنیا مننگ ئِ کہ پاکستان شون نا کسر آ روان ئِ۔ ملک انا شون اکن المی ئِ کہ سیاسی سوگوی و امن مرے۔ اوپارے کہ سی پیک نا دروشم اٹی پاکستان نا شون نا گچین موقع ملانے۔ سی پیک نا دروشم اٹی اللہ بے شمار وارخواہی تسنے، ننے سی پیک نا پوروی کن امنائی اٹ مون آ ہنوئی مریک۔
