اسلام آباد۔ 31اکتوبر (اے پی پی) وزیر خزانہ سینیٹر اسحاق ڈار پارینے کہ ملازمت آتا وارخواہی ودی کننگ حکومت نا اولین اولیت ئِ، حکومت ہندی کشت و کشار و صنعت نا بشخ انا مون آ دننگ کن المی گام گیج چست کننگ ئِ۔ او دوشنبے آ داڑے وزارت ٹیکسٹائل انڈسٹری نا کنڈآن اڈ ہلوک انٹرنیشنل کاٹن ایڈوائزری کمیٹی نا 75می دیوان نا افتتاحی دود آن تران کریکہ۔ داوخت آ سیکرٹری وزارت ٹیکسٹائل حسن اقبال و ڈی جی کمیٹی ہم تران کریر۔ وزیر خزانہ تران کرسا پارے کہ پاکستان دنیا ٹی کاٹن ودی کروک آ چارمیکو بھلا وخت اس کہ کاٹن نا مصرف نا مسٹ میکو و یارن نا برآمد نا دنیا نا ارٹ میکو بھلا ملک ئِ۔ دا بشخ آ توجوہ ترسا پین پیشن نا زرمبادلہ دوئی کننگ مریک ہراڑآن ملکی معیشت شونہال مننگ کیک۔ اوپارے کہ قومی جی ڈی پی ٹی اسہ درسد بشخ کاٹن نا فصل انا ئِ وخت اس کہ ٹیکسٹائل ایکسپورٹس اٹی اونا بشخ 60درسد ئِ۔ اوپارے کہ کاٹن و ٹیکسٹائل نا بشخ 42درسد ملازمت نا وارخواہی فراوان کننگ ئِ وخت اس کہ ہندی ایگری سیکٹر ملک انا آبادی نا اسہ بھلو بشخ اسے زند تدیفنگ کن وسیلہ مہیا کننگ ئِ۔ اوپارے کہ حکومت 40ارب روپئی نا کشاری پیکج نا پڑو ئِ کرینے، داکان بیدس کشاری کڑز آک ہرا 2013ءٹی 336ارب ئسر ودسا 2016ءٹی 700 ارب اسکان سرمسنو۔ اوپارے کہ حکومت بزغر آتے کن کریڈٹ گارنٹی اسکیم درستی راستی کرفینے وبزغر آتے رعایتی نرخ آ بجلی تننگ انگ ئِ۔ اوحکومتی سرسہبی تا ذکر ئِ کرسا پارے کہ حکومت نا دانشمندانہ اقتصادی پالیسی تا سوب ملک سوگوی و پائیدار اقتصادی شون نا کسرآروان مسنے۔ جہانی بینک انا کنڈآن کاروباری آسانی نا بارواٹی تازہ ترین جاری رپورٹ اٹی پاکستان دا رداٹ تینا بین الاقوامی درجہ بندی ٹی چار درجہ گچینی دوئی کرینے۔ اوپارے کہ مسکوہی مالی سال انا وخت حکومت 4درسد جی ڈی پی نا ہدف دوئی کرے۔ ورلڈ بینک، ایشیائی شونداری بینک، جہانی مالیاتی فنڈ و ہارورڈ تون اوار غٹ جہانی ادارہ غاک معاشی حالیت آتیٹی دا گچینی نا معترف ئُ۔ اسحاق ڈار پارے کہ اگہ پائیدار شون نا تسلسل برجاسلیس تو بروک آ اِراسال اٹی ملک 6آن 7درسد جی ڈی پی گروتھ اسکان سرمننگ اٹی سرسہب مریک۔ اوپارے کہ مالیاتی نسخان 2013ءٹی 8.7درسد ئس ہرا 2016ءٹی کم مرسا 4.6درسد اسکان بسنے و 2017-18ءٹی 3.2درسد اسکان کم مریک۔ اوپارے کہ حکومت نا کوشست آتیان محصولات نا وصولی ٹی مسکوہی مسہ سال انا وخت 60درسد ودکی مسنے ہراسالانہ 20درسد ودکی ئِ، زرمبادلہ نا کوڑی 24ارب ڈالر آن تجاوز کرینے ہرا ملک انا تاریخ اٹی غٹ آن بڑز تر کہول ئِ و دا بروک آ پنچ تو انا درآمدات آتون مون تننگ کن کافی ئِ۔ اواومیت ظاہر کرے کہ کمیٹی نا دیوان نا وخت مون آ بروک آ تجاویز کاٹن تون اوار کشت و کشار نا بشخ ئِ مون تروک چیلنج آتون مون تننگ اٹی کمکار ثابت مریک۔ اوداوخت آ وزیراعظم نا کلہو ئِ خوانسا بنفے ہراٹی او کاٹن نا بشخ ئِ پین گچینی کن حکومتی عزم انا اعادہ کرے۔ داوخت آ سیکرٹری وزارت ٹیکسٹائل حسن اقبال کانفرنس نا مقصد آتیا روشنی شاغا۔
