اسلام آباد۔ 31اکتوبر (اے پی پی) پاکستان مسلم لیگ (ن) نا راہشون حافظ عبدالکریم پارینے کہ دھرنہ غاتا سیاست آن قومی و ملکی نسخان تون اوار اوار جہانی کہول آ ملکی ساکھ زہمی مریک۔ احوالکار آتون ہیت وگپ کرسا اوپارے کہ پاکستان مسلم لیگ (ن) نا گچین پالیسی تا سوب ملک شون نا کسر آ راہی روان ئِ و دھرنہ سیاست شون نا کسراٹی اڑاند اتون اوار اوار خلقت آتے کن بھاز انگا ویل آتے ودی کیک۔ اوپارے کہ ملک ئِ شون کننگ کن ہلنگے، عمران خان ئِ دھرنہ غاتا سیاست آن پاناد کروئی مرے۔ حافظ عبدالکریم پارے کہ دارالحکومت ئِ بند کننگ نا مطلب ملک ئِ بند کننگ نا ئِ،داوڑنا کاریم تیان اسکول و کالج آتا طالب علم ، کاروباری شخصیت ، ملازم، سفارتکار و ذرائع ہن و بر بھاز زہمی مریک ہراڑآن انفرادی، قومی و ملکی نسخان تون اوار اوار جہانی کہول آ ملکی ساکھ ہم زہمی مریک۔ اوپارے کہ خلقت آک دھرنہ غاتا سیاست ئِ مسترد کرینو و او ملکی مفادنا خاطر تینا اُراتیان پیش تمنگ کن تیار افس۔ اسہ سوج اسے نا ورندی ٹی اوپارے کہ برانز کننگ ہر بندغ نا جمہوری حق ئِ و اونا ہم وڑوڈول اس مریک، پٹ اسے آ خلقت و میڈیا نا مون آ تینا نقطہ نظر ئِ پیش کروئی مرے شارتے بند کننگ درست عمل اس اف۔
