اسلام آباد۔ 28اکتوبر (اے پی پی) دفاعی جاچکار لیفٹیننٹ جنرل (ر) معین الدین حیدر پارینے کہ بھارت نا کنڈآن لین آف کنٹرول آ سم کاری آن دنیا نا توجوہ ئِ اسہ پلو کننگ آن بیدس کشمیر نا ویل زیات بھلو کچ اسے آ دنیا نا مون آ تالان مننگ ئِ۔ احوالکار آتون ہیت وگپ کرسا او پارے کہ بھارت نا بھلو وخت اسے آن دا کوشست کرسا بننگ ئِ ئِ کہ پاکستان ئِ مچ آ دنیا ٹی بدنام و تنیا کننگے ہراڑکن او علاقائی و جہانی کہول آ ہرفورم آ ہچئُ موقع اس دُو آن اِنپ۔ اوپارے کہ تدوک آ دے بھارت پاکستانی سفارتکار آ دروغ نادوبہ خلسا اودے ملک ئِ ہلنگ نا حکم تسنے۔ معین الدین حیدر پارے کہ پاکستان پرامن ملک اسے و کانود نا عملداری آ یخین تخک ۔ اوپارے کہ کوئٹہ واقعہ ٹی ہم بھارت نا اوار مننگ نا ثبوت ملانے، مودی ہراتم آن اقتدار اٹی بسنے اودے پاکستان ئِ نسخان تننگ آن بیدس پین ہچ ئُ کاریم اس اف، دنیااونا چال آتے پہہ مسنے ولے اونا باوجود ہر کسس تینا تینا مفاد آتے مون آ تخک ہنداسوب ئِ کہ جہانی واک آک کشمیر نا ویل ئِ پہہ مننگ نا باوجود اونا ایسری کن موثر گام گیج چست کننگ آن پاناد ئُ ۔ اوپارے کہ کنٹرول لین آ سم کاری آن بھارت نا مقصد دنیا نا توجوہ ئِ کشمیر نا ویل آن اسہ پلو کروئی ئِ، داوڑکننگ آن دنیا نا توجوہ ویل آن اسہ پلوکننگ آن بیدس دا ویل ئِ پین سوگوی ملک۔ اوپارے کہ ننے کنٹرول لین آ سم کاری نا ورندی ئِ تروئی تمک و دنیا ہم سمجھک کہ اِرا ایٹمی واک آتا نیام اٹ سم کاری آن جنگ ہم شروع مننگ کیک ہراڑآن ڈیہہ تون اوار دنیا نا امن بھس مننگ کیک۔
