حکومت پاکستان کشمیر نا ویل ئِ غٹ جہانی ادارہ غاتیٹی پرزور وڑاٹ چست کننگ ئِ پاکستانی قونصل جنرل نا تران
جدہ۔ 28اکتوبر (اے پی پی) مچ آ دنیا آمبار جدہ ٹی ہم کشمیر اٹی بھارتی فوج انا بیدادی تا برخلاف یوم سیاہ اڈتننگا۔ داوخت آ پاکستان کشمیر کمیٹی نا کنڈآن پاکستان قونصلیٹ اٹی اسہ دود اس اڈ ہلک ہراٹی پاکستانی کمیونٹی نا بھلو کچ اس ساڑی ئس ۔ داوخت آ قونصل جنرل شہریاراکبر پارے کہ بھارت کشمیر اٹی ظلم و ستم کاٹم آن گدرینگانے، حکومت پاکستان کشمیرنا ویل ئِ غٹ جہانی ادارہ غاتیٹی پرزور وڑاٹ چست کننگ ئِ، جنرل اسمبلی ٹی وزیراعظم محمد نواز شریف نا تران، او آئی سی نا غٹ فورم ، ساڑی ہی ٹی نیویارک، تاشقند اٹی مروک آ دیوان آتیٹی ہم دا ویل آ پرزور قرارداد پیش کرینے، دا جہانی برادری ئِ بش کننگ نا کوشست اسے۔ اوپارے کہ ہر بندغ ئِ مرے کہ سوشل میڈیا و تینا فورم نا کمک اٹ دنیا ئِ بھارتی بیدادی تیان معلومدار کیر۔ کشمیر کمیٹی نا صدر مسعود احمد پوری تینا تران اٹی پارے کہ کشمیر کمیٹی تینا غٹ کوشست آتے برجاءتخسا و قونصلیٹ نا کمک آن کشمیر نا ویل ئِ تالان کننگ اٹی اختہ ئِ ۔ کشمیر کمیٹی نا راہشون غلام نبی بٹ تینا تران اٹی پارے کہ برہان وانی نا شہیدی آن گڈ شہیدی تا چرجوئی پیش تمانے و لغور بھارتی سیکورٹی فورسز آک ہردے کودک ورناتے شہید کننگ ئُ ، پیلٹ گن انا کاریم اٹ اتنگ نا نتیجہ ٹی سد آ کشمیریک بینائی آن محروم مسنو ۔ کشمیری راہشون مولانا ارشاد پارے کہ پاکستان نا الس کشمیر نا جہد اٹی کشمیری ایڑ و ایلم تتون تفوک ئُ۔ دود اٹی صدر پاکستان و وزیراعظم نا کلہو آتے خوانسا بنفنگا۔
