کوہاٹ اٹی 3.9ارب روپئی نا خڑچ آن سوئی گیس انا فراوانی، پوسکنو ہسپتال، ہیلتھ انشورنس اسکیم ، کوہاٹ یونیورسٹی نا ویمن کیمپش اس اڈتننگ، پنڈی آن کوہاٹ ریل کار سروس اس بناءکننگ نا پڑو
کوہاٹ۔ 28اکتوبر (اے پی پی) وزیراعظم محمد نواز شریف دا عزم انا درشانی ئِ کرینے کہ پاکستان زوت اسے اٹ اللہ نا فضل و کرم اٹ دنیا نا گچین و شونہال ملک اس جوڑ مریک، حزب اختلاف ئِ ہندا فکر و غم کُننگ اٹی ئِ کہ اگہ پاکستان نا تہٹی شون و شونہالی نا داسفر برجاءسلیس تو 2018ءٹی اوفتا سیاست چٹک و الس ہم اوفتے چاہسنے، بدلی پین کسس آخا نن اتنگ اُن، کوہاٹ ئِ براستہ جنڈ، پنڈی گھیب گچین ہائی وے نا کمک اٹ موٹروے تون گنڈنگک۔ کوہاٹ آن کرک و سرائے لھمبیلہ شاہراہ ئِ ہم گچین ہائی وے اس جوڑ کننگک، کوہاٹ اٹی 3.9ارب روپئی نا خڑچ آن سوئی گیس نا فراوانی ، پوسکنو ہسپتال، ہیلتھ انشورنس اسکیم بناءکننگ، کوہاٹ یونیورسٹی نا ویمن کیمپس اڈتننگ و پنڈی آن کوہاٹ ریل کار سروس بناءکننگ نا پڑو ئِ کیوہ۔ داخیال آتا درشانی ئِ او جمعہ آ داڑے قلعہ گراﺅنڈ اٹی کوہاٹ نا کیہی یونین کونسل آتے کن گیس انافراوانی نا ڈٹ انا بنداو ئِ تخنگ آن پد اسہ بھلو السی مچی اسے آن تران کرسا کرے۔ داوخت آوزیراعظم کوہاٹ نا ضلع کونسل کن 20کروڑ روپئی و تحصیل کونسل کن 10کروڑ روپئی نا گرانٹ نا ہم پڑو ئِ کرے۔ گورنر خیبر پختونخوا اقبال ظفر جھگڑا ، بنجائی وزیر پٹرولیم و قدرتی وسیلہ شاہد خاقان عباسی ، مسلم لیگ (ن)نا صوبائی صدر و مسکوہی وزیراعلیٰ پیر صابر شاہ ، مسکوہی بنجائی وزیر و علاقہ نا پنی شخصیت عباس آفریدی آن بیدس علاقہ نا سرکڑدہ غاک بھلو کچ اسے ٹی داوخت آ ساڑی ئسر۔ وزیراعظم نواز شریف پارے کہ کوہاٹ نا الس تون مخاطب مرسا پارے کہ نمے و نما جوزہ ئِ خنسا اینو کنا است باغ باغ مسنے، الس نا جوش و خروش فخر انا قابل ئِ، داخہ بھلو کچ اسے ٹی الس ئِ خنسا بھاز خوشی مننگ ئِ۔ کنا ایلم عباس آفریدی بھلو وخت اسے آن خواہش ئس کہ ای کوہاٹ نا دورہ ئِ کیو، دا کنا بھاز جوانو سنگت اسے، وزیراعظم پارے کہ عباس آفریدی کنے کوہاٹ نا دورہ کن پارے تو ای ورندی تسٹ کہ کوہاٹ کنا تینا شار ئِ ، کنے کوہاٹ نا الس تون بھاز مابت ئِ ہنداخاطران ای خواوہ کہ ہراتم ای کوہاٹ آ کاو تو خورک دو ہنپر، کوہاٹ نا الس کن گڑاٹیکی اس دیو، وزیراعظم پارے کہ او اینو کوہاٹ نا الس کن اسہ ٹیکی اس بسونے ایسونے ، و دا ٹیکی اوفتیا ہچ ئُ احسان اس اف، دا کنا فرض و نما حق ئِ۔ اوپارے کہ ای سمجھیوہ کہ اگہ اینو داصوبہ ناتہٹی است جم کاریم مسکہ تو اینو داخہ بھلو کچ اسے ٹی خلقت آک مسلم لیگ (ن) اٹی بتوسہ، داڑے انت شون مننگ ئِ او کنے آن جوان نم چارے۔ خیبرپختونخواہ اخس بدل مسنے اودے نم کنے آن جوان چارے ولے ای دا سمجھیوہ کہ کے پی کے بایدے بدل مرے و انشاءاللہ او بدلی ئِ نن اتینہ ۔ اوالس تون ہیت کرے کہ اینو ہراتم کوہاٹ آن ہائی ویز آک جوڑ مریرہ ، موٹرویز آک جوڑمریرہ تو انت دا کوہاٹ اسہ پوسکنو ضلع شار اس جوڑ مریک یا آخا؟ ہراتم کوہاٹ نا تہٹی سوئی گیس بریک تو انت کوہاٹ بدل مریک یا آخا؟ ، وزیراعظم پارے کہ اینو نما مون آ کوہاٹ ئِ سوئی گیس نا فراوانی نا ڈٹ انا بنداو ئِ تخانٹ، 3.9ارب روپئی نا خڑچ آن کوہاٹ ئِ سوئی گیس تننگ انگ ئِ۔ دا چنکو ڈٹ اس اف۔ اوکوہاٹ نا الس ئِ مخاطب کرسا پارے کہ کوہاٹ والا تے کن داوڑ کسس سوچاسس، دیر اس اینو اسکان کوہاٹ ءگیس تننگ نا ہیت کرینے؟ ، نن ہیت کننگ کن بتنن دا ڈٹ ئِ شروع کننگ کن بسونن، اینو دانا افتتاح ئِ کننگ انگ ئِ و نمے معلوم مرے کہ ہراتم نواز شریف وعدہ اس کیک تو اودے پورو کیک سلک ۔ اینوکوہاٹ کن اسہ تاریخ ئُ دے اسے و اینو الحمداللہ صرف کوہاٹ بلکن خوشحال گڑھ، استرزئی، شیر کوٹ، علی زئی، نصرت خیل، ڈوڈہ و لکی ئِ ہم گیس فراوان کننگ انگ ئِ ۔ داڑآ مسہ ارب 90کروڑ روپئی یعنی تقریباََ 400 کروڑ روپئی خڑچہ بریک، دا 400 کروڑ کنا کوہاٹ نا ورنا، بزرگ، ایڑ، المہ غاتیان قربان ئُ۔ اوپارے کہ دا 400 کروڑ نا ہچ ئُ حیثیت اس اف، نواز شریف نا جان ہم نمے آ قربان ئِ۔ اوپارے کہ 2018ءٹی بجلی نا لوڈشیڈنگ ئِ ہمیشہ کن چٹفنگک۔ اوالس ئِ مخاطب کرسا پارے کہ نم چارے کہ ہراتم ننا حکومت بسوسس تو اخس لوڈشیڈنگ مسکہ؟ اوپارے کہ 18,18گھنٹہ اسکان لوڈشیڈنگ مسکہ ہرا اینو بھاز کم مسنے و انشاءاللہ 2018ءٹی بالکل چٹک۔ داکان مست مسکوہی بنجائی وزیر سینیٹر عباس آفریدی پارے کہ وزیراعظم ملک انا شون اکن ہراگام گیج آتے کرینے او مخالفین آتے ہضم مفننگ ئُ، اوفتے خلیس ئِ کہ شون نا سفرہنداوڑ برجاءسلیس تو بروک آ گچین کاری تیٹی مسلم لیگ (ن) نا مقابلہ ئِ کننگ کپسہ۔ خیبرپختونخوا نا براحال ئِ۔ اووزیراعظم آن کوہاٹ آن اسلام آباد اسکان موٹروے نا جوڑ جاڑ، اودے سی پیک نا بشخ جوڑ کننگ، گیس انا فراوانی و ہسپتال نا جوڑ جاڑ نا ڈٹ آتا خواست کرے۔ اوپارے کہ خیبرپختونخوا نا سویلی ضلع غاتا حالیت بے کچ خراب ئِ، سویلی ضلع غاتا تقدیر ئِ بدلیفوک آ شیر اینو اسٹیج آ تولوک ئِ۔ پاکستان ایشیاءنا ٹائیگر جوڑ مریک، نواز شریف کل مسلم دنیا نا راہشون ئِ ، و دنیا خنے کہ پاکستان اٹی نن انتس خوانہ و اسہ چنکا ٹولہ انتس خواہک ۔
