اقوام متحدہ آن جنگ آن زہمی علاقہ غاتیٹی زالبول نا مفادات آتارکھ ئِ باوری جوڑ کننگ نا گام گیج کے، پاکستانی مندوب نا سلامتی کونسل آن تران
نیویارک۔ 27اکتوبر (اے پی پی) پاکستان اقوام متحدہ آن جنگ آن زہمی علاقہ غاتیٹی زالبول نا مفادات آتا رکھ ئِ باوری جوڑ کننگ نا گام گیج کننگ نا خواست کرینے۔ اقوام متحدہ نا سلامتی کونسل آن تران کرسا اقوام متحدہ ٹی پاکستان نا آخبتی مندوب ڈاکٹر ملیحہ لودھی جنگ زدہ علاقہ غاتیٹی زالبول نا حالیت زار ئِ سرحال جوڑ کرسا پارے کہ اقوام متحدہ ئِ جنگ آن زہمی علاقہ غاتیٹی نیاڑی تا مفادات آتا رکھ ئِ باوری جوڑ کننگ و اودے مون آ دننگ کن سنجیدہ گام گیج کروئی مرے۔ اوپارے کہ دا عمل کن شیفکو کہول آن بڑز ہنوئی مریک۔ اوپارے کہ کولمبیا آن یوگنڈا تا برونڈی آن تنزانیہ زالبول اتفاق رائے ودی کروک آ راہشون نا وڑاٹ مون آ بننگ ئِ۔ او بدامنی و تنازعہ غاتیٹی امن و سوگوی نا استعارہ نا وڑاٹ مون آ بننگ ئُ۔ ڈاکٹر ملیحہ لودھی پارے کہ علاقہ غاتا مربوط شون نا ہدف آتا دوئی ٹی زالبول اہم کڑد ادا کننگ ئِ ہرافتا جاگہ ناجاگہ اس تعلق علاقائی امن و سوگوی تون گنڈنگک۔ ہنداخاطران مربوط شون نا جہانی ہدف آتا دوئی نیزگاری نا چٹفنگ، شعبہ جان جوڑی و تعلیم نا شون اکن زالبول ئِ بااختیار بھاز المی ئِ۔ اوپیدواری کرسا پارے کہ امن مشن اٹی پاکستانی زالبول پولیس افسر، ڈاکٹر و نرس آتا دروشم مچ آ دنیا آن تینا خذمت آتے سرانجام تننگ ئُ۔ اوپارے کہ پاکستان مچ آ دنیا ٹی غٹ آن زیات کچ اٹی مہاجر آتے پناہ تروک آ ئِ ہرافتے ٹی اوغان زالبول و مسنک اوارو ہرافتے پاکستان اٹی رہینگسا مفت تعلیم ، جان جوڑی نا آسراتی تننگا و اوفتے رکھوک روزگار فراوان کرے۔
