خلاف ورزیک برجاسلیسر تو پبی ورندی تننگک، پاکستان بے کچ ضبط انا درشانی ئِ کرینے، امن کن ننا جستجو نا غلط مطلب ہلسا اودے نزوری نا علامت تکنگپ، وزیراعظم محمد نواز شریف نا بیان
اسلام آباد۔ 27اکتوبر (اے پی پی) وزیراعظم محمد نواز شریف بھارتی فوج انا کنڈآن ورکنگ باﺅنڈری و لین آف کنٹرول آ ساڑی آ بے خار سم کاری و سیز فائر نا خلاف ورزی تا مذمت ئِ کرسا پارے کہ پاکستان ناامن نا خواہش ئِ نزور تکنگپ۔ پنچ شنبے آ وزیراعظم نا میڈیا آفس نا کنڈآن برجاءبیان نا رداٹ وزیراعظم پارے کہ او چپراڑ و ہرپال سیکٹر زاٹی ورکنگ باﺅنڈری و بھمبر سیکٹر اٹی لین آف کنٹرول آ 25و 26اکتوبر آ بلااشتعال سیز فائر خلاف ورزی تا ترندی اٹ مذمت ئِ کیک ہرافتا نتیجہ ٹی اِرا شاری شہید و 9ٹھپی مسنو۔ اوپارے کہ اگہ دا خلاف ورزیک برجاسلیسر تو پبی ورندی تننگک۔ وزیراعظم پارے کہ نن بے کچ ضبط انا مظاہرہ ئِ کرینن ، امن کن ننا جستجو نا غلط مطلب ہلسا اودے نزوری نا علامت تکنگپ، نن امن پسند قوم اسے اُن ، نن غٹ ایسر نا چاری ویل و تنازعہ غاتے ہیت وگپ نا کمک اٹ ایسر کننگ آ باور کینہ۔ اوپارے کہ اسہ زموار وت واجہ ریاست اسے نا حیثیت آن نن سویلی ایشیانا الس نا اجتماعی شرحالی و شونہالی کن علاقائی امن و سوگوی کن کوشست کننگ اُن۔ اوپارے کہ داہیت افسوزناک ئِ کہ ننا گام گیج و کوشست آتا بھارت نا کنڈآن ہنداانداز اٹ ورندی تننگ تو۔ وزیراعظم محمد نواز شریف پارے کہ بھارتئِ ساڑی آ واقعہ نا جاست وپاست ئِ کروئی مرے و پاکستان ئِ نتیجہ غاتیان معلومدار کننگے۔ اودے تینا فوج ئِ حقیقی روح انا رداٹ سیز فائر نا شرف ئِ کننگ نا پارت کروئی مرے و خلق آتے دانستہ وڑاٹ نشانہ جوڑ کننگ آن پاناد کرسا ورکنگ باﺅنڈری و ایل او سی آ امن ئِ برقرار تخوئی مرے۔
