اسلام آباد۔ 26اکتوبر (اے پی پی) بنجائی وزیر دفاعی پیداوار رانا تنویرحسین پارینے کہ پاکستان مسلم لیگ (ن) نا ساڑی آ حکومت دہشت گردی نا چٹفنگ کن موثر گام گیج کرینے و سیکورٹی فورسز آک ہم اونا برخلاف برسرپیکار ئُ۔ احوالکار آتون ہیت وگپ اٹی سانحہ کوئٹہ نا ترندی اٹ مذمت ئِ کرسا اوپارے کہ بلوچستان اٹی ننا دشمن سرگرم ئِ ۔ بلوچستان نا بابت بھارتی وزیراعظم نریندر مودی نا بیان آن پد را نا اوار مننگ اٹی ہچ ئُ شک اس پین سلپک اوپارے کہ بھارت ئِ پاک چین اقتصادی راہداری ہضم مفننگ ئِ و او اونا کسر اٹی اڑاند شاغنگ و پاکستان ئِ نزور کننگ نا کوشست کننگ ئِ ہراٹی اودے وخت اس ہم سرسہبی دوئی مفک۔ رانا تنویر پارے کہ ننے ملک انا پیشن نا و تہہ نا معاملہ غاتے مون آ تخنگ نا گرج ئِ۔ اوپارے کہ دشمن ملک اٹی انتشار تالان کننگ نا کوشست کننگ ئِ و گڑاس سیاسی عنصر آک ہم اونا آلہ کار جوڑ مسنو۔ اوپارے کہ پاکستان نازرک دور اسے آن گدرینگ انگ ئِ و ساڑی آ حکومت پیشن نا و تہہ نا خلیس آتون مون تننگ کن موثر گام گیج چست کننگ ئِ۔ داوخت آ باسک قومی اسمبلی اسفن یار بھنڈارا پارے کہ سانحہ کوئٹہ آ غٹ سیاسی جماعت آک و قوم افسردہ ئُ۔ اوپارے کہ کوئٹہ ٹی وکیل آتیا جلہو آن گڈ پولیس سینٹر آ ارٹ میکو بھلا جلہو ئِ ننے قومی یکجہتی و سیکورٹی گام گیج آتے پین گچین جوڑ کننگ نا گرج ئِ۔
