اسلام آباد۔ 26اکتوبر (اے پی پی) وزیراعظم محمد نواز شریف پارینے کہ پاکستان نیزگاری ٹی کمتی اتنگ کن علاقائی اتحاد نا کمک اٹ اقتصادی کمکاری ئِ مون آ دننگ کن پرعزم ئِ، علاقائی اتحاد، امن ، سوگوی و پائیدار اقتصادی شون اکن ”کاریک“ نا فورم اومیت بڈ ئِ ۔ او چارشنبے آ وسط ایشیائی علاقائی اقتصادی کمکاری (کاریک) نا 15می وزارتی دیوان نا افتتاحی دود آن تران کریکہ۔ وزیراعظم پارے کہ کاریک اسہ اہم ئُ پروگرام اسے ہرا فزیکل نیٹ ورک، بنداوی ڈھانچہ، امن، سوگوی و اقتصادی شون کون آ بھلا بشخ آتیٹی علاقائی ملک آتا است بڈی ئِ کیک۔ وزیراعظم پارے کہ کاریک باسک ملک آتا نیام اٹ واپار نا آسودہی آ مبنی پالیسی تا کمک اٹ نیزگاری ٹی کمتی اتنگ نااہم ئُ فورم اسے۔ اوکاریک دیوان اٹی شرکت کروک آ مندوبین آتا خیرمقدم ئِ کرسا دا یخین نا درشانی ئِ کرے کہ داڑآن علاقائی شون و شونہالی نا تغ ئِ حقی دروشم تننگ اٹی کمک رسینگک۔ وزیراعظم محمدنواز شریف پارے کہ پاکستان 2010ءٹی کاریک نا باسک جوڑ مس و پائیدار شون اکن المی ڈٹ آتا آسودہی ٹی فعال کڑد ادا کننگ ئِ۔ اوکاریک نا ویژن ئِ مون آ دننگ کن اہم گام گیج تجویز کرسا پارے کہ انسانی وسیلہ غاتا بشخ اٹی علم آ کاریم کننگ کن کاریک ملک آتا چاہندار آتا اسہ پول اس جوڑ کروئی مرے۔ فنانس،بینک، مارکیٹنگ ، توانائی و انفراسٹرکچر نا بشخ آتیٹی اونا مہارت آتیان استفادہ کننگ مریک، اونا نتیجہ ٹی ڈیہہ ٹی علم انا منتقلی ممکن مننگ کیک ۔ وزیراعظم ملک انا اقتصادی حالیت آتیٹی ساڑی آ سال آتا وخت گچین کارکڑد آن معلومدار کرسا ساڑی آ حکومت نا اقتصادی اصلاحات و معاشی سرسہبی تے تالان کرے و پارے کہ پاکستان واپاری سرجزآتیٹی بین الاقوامی معیار آتیا عمل کننگ ئِ ، اوپارے کہ کاریک نا باسک ملک آک پاکستان نا سول ایوی ایشن اتھارٹی تون اواری اٹ ”کاریک ایوی ایشن اینڈ اوپن سکائیز ایگریمنٹ“ آ کاریم کننگ کیرہ۔ اوکاریک نا کنڈآن علاقائی شون نا ڈٹ آتیٹی 29ارب ڈالر فراوان کننگ نا ستائِ کرسا دا اومیت نا درشانی ئِ کرے کہ بروک آ 10سال انا وخت کاریک نا وسط مدتی جاچ ترند رفتار اقتصادی کمکاری نا اسہ موقع اس ثابت مریک اوپارے کہ کاریک باسک ملک آتا وخت خاص کر توانائی، ٹرانسپورٹیشن و واپار نا بشخ آتیٹی کمکاری نا مون آ دننگ نا بھلو ادارہ اسے۔ پاکستان سویلی ایشیاءو نیامی ایشیا نا نیام اٹ رابطہ غاتا کمک نا وڑاٹ کاریک نا کلیدی کمکارنا حیثیت تخک۔ وزیراعظم پارے کہ اینو نا حالیت آتیٹی بھلو چیلنج آک مون تروک ئُ ولے نن اوفتے تون گچین وڑاٹ مون تننگ نا لائخی تخنہ۔ اوپارے کہ پاکستان اقتصادی سوگوی دوئی کرینے و چین پاکستان اقتصادی راہداری (سی پیک)نا رداٹ توانائی ، ٹرانسپورٹ ، انفراسٹرکچر نا ڈٹ آتیا بھلو ترندی اسے تون کاریم مننگ ئِ۔ پاکستان آن بیدس کاریک ملک آک ہم سی پیک نا فائدہ غاتیان مستفید مریرہ۔ داوخت آ بنجائی وزیر خزانہ سینیٹر اسحاق ڈار و ایشیائی شونداری بینک نا صدر تاکی ہیکو نکاﺅ ہم تران کرے۔ کاریک وزارتی دیوان نا افتتاحی دود اٹی وزراء، باسک پارلیمنٹ، باسک ملک آتا مندوبین، علاقائی و بین الاقوامی تنظیم آتا نمائندہ ، سفارتکار و سینئر کمامدار آک ہم شرکت کریر۔
