عمران خان ہر دروشم اٹ وزارت عظمیٰ نا منصب ئِ دوئی کننگ خواہک، غلام احمد بلور

غٹ ادارہ غاتا ساڑی گری ٹی دھرنہ و برانز نا ہچ ئُ جواز اس اف
اسلام آباد۔ 25اکتوبر (اے پی پی) قومی اسمبلی ٹی عوامی نیشنل پارٹی نا پارلیمانی لیڈر حاجی غلام احمد بلور پارینے کہ عمران خان ملک اٹی حالیت آتے خراب کرسا آمریت نا کسر ئِ ہموار کننگ خواہک و او ہر دروشم اٹ وزارت عظمیٰ نا منصب ئِ دوئی کننگ خواہک۔ اسمبلی ٹی اقلیتی جماعت تینا مرضی ئِ مسلط کننگ خواہک ہرا جمہوری اقدار نا برعکس ئِ ۔ دوشنبے آ پارلیمنٹ ہاﺅس اٹی ”اے پی پی“ تون خصوصی ہیت وگپ کرسا اوپارے کہ ملک انا بدقسمتی ئِ ایلو غٹ سیاسی جماعت آک خوارہ کہ ملک اٹی جمہوریت چلینگسا کے و اسہ بندغ اس ہندن ئُ ارے ہرا خواہک کہ ہراوڑکے مرے او وزیراعظم جوڑ مرے۔ اسہ سوج اسے نا ورندی ٹی اوپارے کہ عمران خان جمہوریت ئِ خواہپک ہی بلکن او ملک آن جمہوریت ئِ چٹفنگ خواہک۔ اوپارے کہ غٹ ادارہ غاتا ساڑی گری ٹی داوڑنا دھرنہ و برانز نا ہچ ئُ جواز اس اف، عمران خان خواہک کہ بندغ آک کہیر و اودے اقتدار ملے۔ اسہ پین سوج اسے نا ورندی ٹی اوپارے کہ اسمبلی ٹی اقلیتی پارٹی خواہک کہ انتس کہ اوخوارہ ہندن مرے ہالانکہ داوڑوخت اس ہم متنے۔ جمہوری راج اٹی جمہوری قدرآک اہم مریرہ ہرافتے آ جمہوریت پسند جماعت آتے کاربند سلوئی مرے۔ اوپارے کہ سپریم کورٹ تینا دنگ انا تہٹی سلسا فیصلہ کروئی مریک ، اوڑآ ہچ گہس تینا مرضی ئِ مسلط کننگ کپک۔