اسلام آباد۔ 25اکتوبر (اے پی پی) پنی دفاع جاچکار حسن عسکری پارینے کہ دہشت گردی نا چٹفنگ کن دہشت گرد آتا نیٹ ورک ، مخ تف و فنڈنگ کروک آتا ڈس و نشان ئِ خلنگ المی ئِ۔ نجی ٹی وی چینل تون ہیت وگپ کرسا اوپارے کہ کوئٹہ ٹی تدینگوک آ اِرا سال اٹی دہشت گردی نا جلہو آتیٹی کمتی مس ولے تدوک آ نن پولیس ٹریننگ سینٹر آ جلہو دا سجفنگ آ بیوس کرینے کہ دہشت گرد آک داسہ ہم ساڑی اریر و دا ٹارگٹ نا تلاش اٹی مریرہ و موقع ملنگ تون جلہو کیرہ۔ اوپارے کہ دہشت گردی نا چٹفنگ کن المی ئِ کہ سیکورٹی گام گیج آتیٹی بدلی تون دہشت گرد آتا نیٹ ورک ، مخ تف ، فنڈنگ و ٹریننگ تروک آتا ڈس و نشان ئِ خلنگے۔ حسن عسکری پارے کہ دہشت گردی نا پورو چٹفنگ کن المی ئِ حکومت ، سیاسی نمائندہ ، صوبائی و قومی اسمبلی نا باسک آک تینا تینا علاقہ غاتیٹی خلقت آتیٹی دہشت گردی و انتہاپسندی نا برخلاف شعور تالان کیر تانکہ راج اٹی اتحاد ودی مرے و دہشت گردآتا برخلاف موثر کارروائی ئِ عمل اٹ اتنگ مرے۔
