اسلام آباد۔ 25اکتوبر (اے پی پی) وزیراعلیٰ پنجاب محمد شہباز شریف پارینے کہ کوئٹہ ٹی پولیس ٹریننگ سینٹر آ جلہو سانحہ سے آن کم اف، داوڑنا واقعہ غاک ننا حوصلہ ئِ پست کننگ کپسہ۔ اے آر وائی نیوز نا رداٹ میڈیا تون ہیت وگپ اٹی تدوک آنن کوئٹہ نا خڑک سریاب روڈ آ پولیس ٹریننگ سینٹر آ خودکش جلہو نا ترندانگا لوز آتیٹی مذمت ئِ کرسا اوپارے کہ دہشت گرد و اوفتا کمکار آتا پورو چٹفنگ اسکان جنگ برجاءسلک، دہشت گرد آک دننگا لغورانگا جلہو آتیان قوم انا بے لڑزوخ عزم ئِ نزور کننگ کپسہ۔ وزیراعلیٰ پنجاب نا مستی پاننگ ئس کہ دہشت گردی نا برخلاف نن غٹ متحد اُن، دہشت گرد آک بدترین سفاکیت و بربریت نا مظاہر ہ ئِ کرینو۔ دہشت گرد آتا لغوری جلہو نا اخس ہم مذمت ئِ کننگے کم ئِ۔ وزیراعلیٰ شہباز شریف سانحہ غا ڈکھ و افسوز نا درشانی ئِ کرسا ٹھپی کارندہ غاتا زوت جان جوڑی کن دعا ہم کرے۔
