اسلام آباد۔ 19اکتوبر (اے پی پی) بنجائی وزیر خزانہ سینیٹر اسحاق ڈار پارینے کہ پاکستان اٹی توانائی نا فراوانی و امن و ایمنی نا حالیت آتیٹی نمان گچینی بسنے۔ ملکی معیشت نا غٹ بشخ آک درملکی زرکاری کن ملوک ئُ، امریکہ نا حکومت پاکستان اٹی نجی امریکی زرکاری ٹی آسراتی فراوان کے۔ او داخیال آتا درشانی ئِ داڑے امریکہ نا واپاری نمائندہ ایمبیسیڈ ر مائیکل فورمین تون ہیت وگپ کرسا کرے ہراک اسلام آباد اٹی اوڑتون اوڑدہی کریر۔ وزیر خزانہ مائیکل فورمین ئِ حکومت نا کنڈآن معیشت نا سوگوی کن کروک آ اصلاحات آتا بارواٹی پارے۔ اوپارے کہ پاکستان توانائی نا کاختی نا مون ئِ توننگ کن ہم نمان پیش رفت کرینے و ملک اٹی سیکورٹی نا حالیت آتے گچین جوڑ کرینے۔ اوپارے کہ پاکستان اٹی مروک آ ٹیکس اصلاحات آتا نتیجہ ٹی ٹیکس انا دنگ گیشترمسنے و مسکوہی مسہ سال انا وخت ریکارڈ خراج وصول کننگانے۔ مائیکل فورمین آئی ایم ایف نا پروگرام نا سرسہب پوروی آ وزیر خزانہ ئِ مبارکبادی تس و معیشت ئِ گچین جوڑ کننگ کن ساڑی آ حکومت نا گام گیج آتا ستائِ کرے۔ اوپاکستان اٹی زرکاری نا چاگڑد و اقتصادی حالیت آتا گچینی نا ہم اعتراف ئِ کریر و ہڑتوم آ کنڈآتا واپاری رابطہ غاتا مون آ دننگ کن پورو مخ تفی نا باوری ترفیر۔ اسحاق ڈار پارے کہ ملک اٹی کاروبار کننگ نا عمل ئِ گچین جوڑ کننگ کن زرکاری پالیسی 2013ءآ عمل کننگ انگ ئِ و غٹ اقتصادی بشخ آک درملکی زرکاری کن ملوک ئُ۔ اوامریکی حکومت آ زورشاغا کہ او پاکستان اٹی نجی امریکی زرکاری ٹی آسراتی فراوان کے۔ امریکہ نا واپاری نمائندہ پارے کہ پاکستان نا انفارمیشن ٹیکنالوجی نا بنداوی ڈھانچہ نا شون ستاءکڑزک۔ اوجہانی واپاری تنظیم (ڈبلیو ٹی او) نا ٹریڈاینڈ سروسز معاہدہ ٹی پاکستان نا گچین شرکت آ وزیر خزانہ نا منت واری ئِ ادا کرے۔
