لاچین۔ 29مئی (اے پی پی) وزیراعظم محمد شہباز شریف پاکستان و آذربائیجان نا نیام اٹ چندی بشخ آتیٹی تعلقداری تے سوگو کننگ نا عزم انا درشانی ءِ کرسا پارینے کہ آذربائیجان تون واپار، دفاع، تعلیم ، جان جوڑی تون اوار چندی بشخ آتیٹی تین پہ تینی کمکاری ءِ پین ودفنہ۔ آذربائیجان پاکستان اٹی 2 ارب ڈالر نا زرکاری کیک۔ اوداہیت ءِ پنچ شنبے نادے آداڑے آذربائیجان نا دورہ ءِ پورو کننگ آن پد تاجکستان آ روانگی آن مست لاچین بالی پٹ آ میڈیا تون گپ وتران کرساپارے۔ وزیراعظم پاکستان و آذربائیجان کن 28 مئی نا اہمیت ءِ بیان کرسا پارے کہ دااسہ اہم ءُ دے اسے ہراتم 28 مئی 1998 آ پاکستان ایٹمی دھماکہ کرے و ایٹمی قوت نا حامل ملک جوڑ مس۔ دا ایلم ملک آذربائیجان نا آجوئی نادے ہم ارے۔ اوپارے کہ صدر الہام علیوف نا کماشی ٹی آذربائیجان پورو وڑاٹ بدل مسنے و او شاندار شونداری کرینے۔ اوپارے کہ دورہ ٹی نن واپار، زرکاری، کاروباری بشخ اٹی شریداری کاریم نا بابت سرجمی اٹ گپ وتران کرین۔ اوپارے کہ صدر الہام علیوف پاکستان اٹی اِرا ارب ڈالر نا زرکاری نا عزم انا درشانی ءِ کرساپارے کہ نن اسیجائی فائدہ غاتیکن دا زرکاری کننگ کن تیار اُن۔ وزیراعظم پارے کہ نن واپار، دفاع، تعلیم و جان جوڑی تون اوار ایلو بشخ آتیٹی تین پہ تینی کمکاری ءِ ودفنہ۔ اوکان پد وزیراعظم محمد شہباز شریف آذربائیجان نا مسہ دے ئی دورہ ءِ پورو کننگ آن پد تاجکستان نا دارالحکومت دوشنبہ کن روانہ مس تو لاچین نا جہانی بالی پٹ آ آذربائیجان نا نائب وزیرخارجہ ایلنورمامیدوف، آذربائیجان اٹی تعینات پاکستانی سفیر قاسم محی الدین و ایلوسفارتی عملہ اودے رخصت کریر۔ وزیراعظم تینا دورہ ءِ آذربائیجان اٹی آذربائیجان نا صدر الہام علیوف تون اوڑدہی کرے۔ اوپاکستان۔ترکیہ، آذربائیجان سہ فریقی سربراہی دیوان اٹی بشخ ہلک۔ اوآذربائیجان نا یوم آجوئی نا دود اٹی ہم بشخ ہلک۔ وزیراعظم دوشنبہ ٹی گلیشیئرآتا رکھ انا بارواٹی مروک آ جہانی کانفرنس اٹی بشخ ہلیک۔
