اسلام آباد۔ 22اپریل (اے پی پی) بنجائی وزیر اطلاعات و نشریات سینیٹر پرویز رشید نمل یونیورسٹی اسلام آباد اٹی مسلمان تا رسم و رواج نا عکاسی آ تالان ”ون بیلٹ ون روڈ“ عکسی فن پارہ غاتا نمائش نا افتتاحئِ کرے۔ نمائش نا بست و بند ئِ پاکستان اٹی السی جمہوریہ چین نا سفارتخانہ و نینگسیا اسلامک فرینڈ لی کونسل نمل یونیورسٹی نا کمک آن جمعہ آ داڑے یونیورسٹی کیمپس اٹی کرے۔داوخت آ چینی سفارتخانہ نا ناظم الامور چاﺅلی جیان و ننگیسا اسلامی فرینڈلی کونسل نا سروک ہی لیانگ جی ہم ساڑی ئس۔ نمائش نا افتتاح نا وخت آ صحافی تے تون ہیت و گپ کرسا بنجائی وزیر اطلاعات و نشریات سینیٹر پرویز رشید پارے کہ اسلام آباد اٹی دا نمائش نا اڈتننگ پاکستان و چین انا الس نا نیام اٹ دودوربیدہ و بھلن برادرانہ تعلقداری ، چین نا حکومت نا نسلی مساوات و مذہبی آجوئی نا پالیسی ، ہراڑآن چین اٹی مسلمان مساوی حق آن مستفید مننگ ئُ، نا عکاس ئِ۔ اوپارے کہ نن پاکستان و چین نا نیام اٹ سفارتی تعلقداری تا اڈتننگ نا 65می سالانہ دود آتے اڈتننگ ان و دا نمائش ہند اچرجوئی نا اسہ کڑی اسے ۔ بنجائی وزیر پارے کہ ہڑتوم آ ملک آتا الس سنگتی و ایلمی نا سوگو رشتہ غاتے ٹی تفوک ئُ۔ اوچینی راج اٹی تحمل، سگ و ہم آہنگی نا مون آ دننگ کن نینگسیا اسلامک فرینڈلی کونسل نا کوشست آتا سفت ئِ کرے۔ اوپارے کہ دا ڈول نا نمائش آتا اڈتننگ آن الس نا الس تون رابطہ غاتے سوگو و ہڑتوم آ ملک آتا نیام اٹ ساڑی آ دوستانہ تعلقداری تے پین سوگو کننگ اٹی کمک رسینگک۔سینیٹر پرویز رشید پارے کہ چین پاکستان اقتصادی راہداری شاہراہ ریشم تون جوڑ جاڑ کننگ انگ ئِ ہراڑآن پاک چین تعلقداری تے پین ٹھوس اقتصادی بنداوفراوان مریک۔ ہڑتوم آ ملک آتا نیام اٹ تعلقداریک داسا کارپوریٹ و دودربیدہ ہڑتوم آپلوآتے بدل مننگ کیرہ۔ اوپارے کہ پاک چین تعلقداری ہڑتوم آ قوم تا الس نا خوائش آتیا محیط ئُ و دننگا نمائش آک ہڑتوم آ ملک آتا الس ئِ پین خڑک اتیرہ۔
