وت جوریشتی ھیل کاری ءِ دیمروئی ءِ جہد اجارہ داری یا رسائی ءِ رکاوٹانی سبب جوڑ مہ بنت، نائب مزن وزیر محمد اسحاق ڈار

نیویارک۔24ستمبر  (اے پی پی): نائب مزن وزیر ءُ دری کارانی وزیر سینیٹر  محمد اسحاق ڈار ءَ وت جوریشتی ھیل کاری ءِ ڈیزائن، دیمروئی ءُ یکجا کنگ ءِ ہر پڑ ءَ انسانی صوابدید ءُ کنٹرول ءِ برجائی ءِ سرا زور پر دات ءُ گوشت کہ اے پڑ ءَ دیمروئی ءِ کوشست نوکیں رنگ ءِ رسائی ءِ رکاوٹ یا اجارہ داری ءِ سبب جوڑ مہ بیت۔ پنچ شمبے ءِ روچ ءَ درئی کارانی کارگس ءِ نیمگ ءَ جاڑی بوتگیں بیان ءِ رد ءَ نائب مزن وزیر اقوام متحدہ ءِ سلامتی کونسل ءِ نیمگ ءَ ’’وت جوریشتی ھیل کاری ءُ میاں اوستمانی سلامتی‘‘ ءِ سرھال ءِ سر ءَ بریفنگ ءَ گوں تران کنگ ءَ ات۔ اے گند ءُ نند ءِ بندوبست فرانس ءِ نیمگ ءَ اقوام متحدہ ءِ سلامتی کونسل ءِ سروکی ءَ ستمبر ءِ واستہ کنگ بوتگ۔ اے دیوان ءِ سروکی ءَ فرانس ءِ دری کارانی وزیر ءَ کتگ ءُ ایشی ءِ تہ ءَ سلامتی کونسل ءِ باسکیں ملک آنی مزنیں اگدہ دار ھوار بوتگ اَنت کہ ایشی ءِ تہ ءَ برطانیہ ، ڈنمار ءُ جمہوریہ کانگو ءِ درئی کار ، دولت مشترکہ ءُ دیمروئی ءِ کارانی وزیر ءُ امریکہ ءِ پولیسی آفس ءِ معاون ءُ وائٹ ہاؤس ءِ پولیسی آفس ءُ ڈائریکٹر سائنس ءِ کارگس ھوار اَنت۔ گند ءُ نند ءَ پاناما، یونان، سومالیہ، بحرین، لیٹویا، کولمبیا، چین، روسی فیڈریشن ءُ لائبیریا ءِ نمائندگاں ھم بہر زرتگ ات۔ کونسل ءَ را اقوام متحدہ ءِ وت جوریشتی ھیل کاری ءِ بابت ءَ بین حکومتی آزاد پینل ءِ شریک چیئرمین پروفیسر جوشوا بینگیو، اوپن اے آئی ءِ چیف ایگزیکٹو آفیسر سمیع آلٹمن، انتھروپک ءِ چیف ایگزیکٹو آفیسر داریو عمودی ءُ کلیمنٹ ڈیلونگ، ہائیگینز فیسا ءِ چیف ایگزیکٹو آفیسر ءَ بریفنگ داتگ۔ معاون مزن وزیر ءَ وت جوریشتی ھیل کاری ءِ ڈیزائن، دیمروئی ءُ یکجا کنگ ءِ درستیں پڑ آنی تہ ءَ انسانی صوابدید ءُ کنٹرول ءِ برجائی ءِ ارزشت ءِ سر ءَ زور پر دات۔ آئی ءَ وت جوریشتی ھیل کاری ءِ اسلحہ ءِ دوڑ ءِ دگہ پڑ جوڑ بوھگ ءَ چہ رکگ ءُ فوجی شوبگ ءَ پیسلہ کنگ ءِ واستہ ردیں حساب ءُ کتاب ءُ محدودیں وھد ءِ سبب ءَ پیداکیں خطرہ آناں گیش ءُ گیوار کنگ ءِ لوٹ کتگ۔ نائب مزن وزیر ءُ درئی کارانی وزیر ءَ ھشدار داتگ کہ وت جوریشتی ھیل کاری ءِ پڑ ءَ پیشرفت ءِ رفتار ءَ گوں ھمگام بوھگ ءِ کوشست نوکیں رنگ ءِ اجارہ داری یا رسائی ءِ راہ ءَ بندش ءِ سوب جوڑ مہ بنت ءُ ایمنی ءِ نام ءَ زورگ بوتگیں گامگیج آناں ٹیکنالوجی ءَ چہ زبھر کنگ ءِ وسیلگ ءَ بدل کنگ مہ بیت۔ آئی ءَ لوٹ کت کہ اے آئی گورننس ءِ جیڈھ ءَ را اقوام متحدہ ءِ چیردستی ءَ نمائندہ ءُ شمولیت ءِ فورم آنی تہ ءَ سرجمیں ملک آنی بھر زوری ءَ گوں جھان ءِ تک ءَ چار ءُ تپاسی کنگ بہ بیت۔ آئی ءَ جنیوا ءَ اے آئی گورننس ءِ ھوالگ ءَ اولی رند ءَ اقوام متحدہ ءِ گلوبل ڈائیلاگ ءِ بندات ءَ را وش اتک کت ءُ ورلڈ آرٹیفیشل انٹیلی جنس کوآپریشن آرگنائزیشن ءِ بنجاہی باسک ءِ بستار ءَ پاکستان ءِ کرد ءَ را پدر کت ءُ ایشی ءَ را درست آنی فائدگ ءُ وشھالی ءِ واستہ اے آئی ءِ دیمروئی ءِ نیمگ ءَ یک ٹھوس گامگیج لیک ات۔ نائب مزن وزیر ءَ اے آئی ءِ ھوالگ ءَ میاں اوستمانی کمک ءَ را گیش کنگ ، اے آئی ءِ جھان ءِ فرق ءَ را گیش کنگ ءُ درست آنی واستہ امن ءُ دیمروئی ءِ واستہ اے آئی ءَ را یکسانیں رسائی ءَ را گیش کنگ ءِ واستہ پاکستان ءِ جزم ءِ سر ءَ پدا زور دات۔