اسلام آباد۔ 22اپریل (اے پی پی) صدر مملکت ممنون حسین تون وزیراعظم محمد نوازشریف ایوان صدر اٹی اوڑدہی کرے ۔ جمعہ نا سہب مروک آ دا اوڑدہی ٹی ملک انا جمی حالیت و پاک چین اقتصادی راہداری ڈٹ انا تحت توانائی نا برجاءڈٹ، امن و ایمنی نا حالیت، آپریشن ضرب عضب و قومی معیشت نا احیاءنا معاملہ غاتیا درشانِ خیال کننگا۔ ایوان صدر نا کنڈآن برجاءبیان نا رداٹ وزیراعظم داوخت آ صدر مملکت ئِ جتا معاملہ غاتے ٹی حکومت نا پالیسی و فیصلہ غاتیان ہم آگاہ کرے۔ صدر مملکت پارے کہ وزیراعظم و اونا اقتصادی ٹیم تینا سوگو حکمت عملی نا تحت قومی معیشت نا گچینی کن قابلِ قدر کڑد ادا کننگئِ۔ ہڑتوم آ راہشونک خواست کرینو کہ ملک اٹی سوگوی و شون اکن دا شونداری ڈٹ آتا پوروی ٹی حکومت تون کمک کننگے۔ ہڑتوم آ راہشونک پاریر کہ حکومت شونداری ایجنڈہ آن تینا توجوہ ئِ اسہ پلو کپسہ و ملک انا شون و الس نا زندی آب اٹی گچینی کن شونداری ڈٹ آتے پورو کننگ کن تندہی اٹ کاریم کرساکیک۔ اوپاریر کہ حکومت جتا شونداری ڈٹ آتیا عملدرآمد کرسا الس نا پیسہ غاتا درست و شفاف کاریم اٹ اتنگ ئِ ہر دروشم اٹی باوری جوڑ کینہ و بدعنوانی ئِ ہچ ئُ کہول اسیا سگنگ پننگک۔ صدر مملکت و وزیراعظم آپریشن ضرب عضب نا وخت آ دوئی مروک آ سرسہبی تیا است جمی نا درشانی ئِ کرسا پاریر کہ ملک اٹی آخریکو دہشت گرد نا چٹفنگ اسکان دا آپریشن برجاسلک۔ ہڑتوم آ راہشونک دہشت گردی و انتہاپسندی تون مون تننگ کن سلہہ بند فوج و کانود نافذ کروک آ ادارہ غاتا افسر و ورناتا قربانی تے خراجِ تحسین پیش کریر و دا عزم انا درشانی ئِ کریر کہ ملک انا غٹ بشخ آتے ٹی پورو امن نا بحالی کن نیشنل ایکشن پلان آ عمل برجاسلک۔صدر مملکت و وزیراعظم پاک چین اقتصادی راہداری نا جوڑجاڑ نا رفتار آ است جمی نا درشانی ئِ کرسا پاریر کہ دا ڈٹ نہ صرف پاکستان بلکن مچ آ ڈیہہ کن گیم چینجر اس ثابت مریک۔ ہڑتوم آ راہشونک دا عزم انا درشانی ئِ کریر کہ پاک چین اقتصادی راہداری نا عظیم الشان ڈٹ آن غٹ صوبہ و ڈیہہ تے اسہ وڑنا فائدہ دوئی مریک۔ ہڑتوم آ راہشونک پاکستان ئِ مون تروک ویل آتا مون ئِ توننگ و شون و شونہالی نا شاہراہ آ روان تخنگ کن اتحاد و یکجہتی نا گرج آ زور شاغار۔
