کشمیری کسرشون تا اقوام متحدہ نا سیکرٹری جنرل بان کی مون ئِ چھٹی
واشنگٹن۔ 27ستمبر (اے پی پی) کشمیری کسرشونک اقوام متحدہ نا سیکرٹری جنرل بان کی مون تون پارینو کہ کشمیر نا ویل پاکستان و بھارت نا نیام اٹ جوہری جنگ انا سوب جوڑ مننگ کیک ہنداخاطران او ذاتی نیام تمسا کشمیر نا ویل ئِ سلامتی کونسل اٹی چست کیر، داہیت ئِ آزاد جموں وکشمیر نا مسکوہی صدر بیرسٹر سلطان محمود چوہدری ، وزیراعظم نا مسکوہی سلاہکار برائے آزاد جموں و کشمیر سردار ثروت خان ، ورلڈ کشمیر اویئر ینس نا سیکرٹری جنرل ڈاکٹر غلام نبی فائی و کشمیری امریکن کونسل نا صدر ڈاکٹر امتیاز خان اقوام متحدہ نا سیکرٹری جنرل بان کی مون ئِ تینا چھٹی ٹی پاریر۔ ہراٹی کشمیری کسرشونک جہانی ادارہ نا توجوہ ئِ مقبوضہ کشمیر اٹی انسانی حق انا بگڑینگوک آ حالیت آتا کنڈا ترفینو۔ دا چھٹی جہانی ادارہ نا سروک ئِ ہمووخت آ سرکننگا ہراتم بھارتی وزیر خارجہ سشما سوراج جنرل اسمبلی آن تران کریکہ۔ داوخت آ بھارتی وزیر خارجہ نا تران نا وخت نیو یارک اٹی اقوام متحدہ نا ہیڈ کوارٹر نا مون آ کشمیریک برانزی مچی ہم کریر۔ مچی کروک آک بھارت نا برخلاف نعرہ خلکر و کشمیر نا آجوئی نا خواست کریر۔ اواقوام متحدہ و امریکہ غا زورشاغار کہ او کشمیر نا ویل انا بارواٹی اقوام متحدہ نا سلامتی کونسل نا قرارداد آتیا عملدرآمد کرفے۔ چھٹی ٹی پاننگانے کہ مقبوضہ کشمیر اٹی جاری ساڑی آ انتفادہ نا وخت 105آن زیات کشمیری شہید و 10 ہزار آن زیات ٹھپی مسنو۔ وخت اس کہ بھارتی فوج انا کنڈآن پیلٹ گن آتا کاریم اٹ اتنگ آن چنانیاڑی تتون اوار 600 آن زیات کشمیری بینائی آن محروم مسنو۔ کشمیری کسرشونک پاریر کہ مقبوضہ کشمیر نا حالیت آتیان اقوام متحدہ نا خفک ہندن آن ہندن کرئُ ہراڑآن دا تاثر ودی مریک کہ بھارت ئِ مقبوضہ کشمیر اٹی ڈوہ آ استثنیٰ دوئی ئِ و اقوام متحدہ انسانی حق انا کانود آ عملدرآمد کن جانبدار ئِ۔ چھٹی ٹی پاننگانے کہ اسہ کنڈا کریمیا ٹی لس خون آ واویلا و ارٹ میکو کنڈا مقبوضہ کشمیر اٹی بھلو کچ اسے ٹی کشمیری تا لس خون و 1949 ءنا جنیوا کنوینشن نا خلاف ورزی آ خاموشی دوہرا معیار ئِ۔ کشمیری کسرشونک اقوام متحدہ نا سیکرٹری جنرل تون پاریر کہ معاملہ اقوام متحدہ نا سلامتی کونسل اٹی چست کیر۔ اوفتا پاننگ ئس کہ دا ویل انا ایسری آخبتی باسک آتا رویہ و پالیسی تیا منحصر ئِ واہم اوفک بایدے داہیت آن معلومدار مریر کہ کشمیر نا ویل انا ایسری ٹی بے سہبی سویلی ایشیاٹی امن و ایمنی کن بھلو خطرہ اسے و پاکستان و بھارت نا نیام اٹ اسہ پین جنگ اسے نا سوب جوڑ مننگ کیک ہرانا مچ آ دنیا غا بے شمار زئم آک تمرہ انتئے کہ داسا ہڑتوم آ ملک آک جوہری لائخی تخرہ۔ کشمیری کسرشونک اومیت ظاہر کریر کہ اقوام متحدہ نا سیکرٹری جنرل نا ذاتی نیام تمنگ آن کشمیر نا ویل ئِ اقوام متحدہ نا قرارداد و جموں و کشمیر نا الس نا است خواہی تا رداٹ ایسر کننگ اٹی کمک رسینگک۔
