اقوام متحدہ۔ 27 ستمبر (اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی پارینے کہ بھارت بھلو وخت اسے آن ریاستی دہشت گردی نا سرپرستی ئِ کننگ ئِ۔ اقوام متحدہ نا جنرل اسمبلی ٹی بھارتی وزیر خارجہ نا تران آ ورندی نا حق ئِ کاریم اٹ اتسا پاکستانی مندوب پارے کہ جموں و کشمیر وخت اس ہم بھارت نا اٹوٹ انگ متنے و نہ ہی پین وخت اس مننگ کیک ۔ اوبھارتی وزیر خارجہ سشما سوراج نا دروغ و بے بنداو داواتے پاش کرسا بھارتی وزیر خارجہ جنرل اسمبلی آن تران اٹی بلوچستان نا ویل ئِ چست کرسا اقوام متحدہ نا چارٹر اٹی درج اصول آتا کھلی خلاف ورزی ئِ کرے۔ اوپاکستان ئِ جہانی برادری ٹی تنیا کننگ نا بھارتی خواست ئِ خودفریبی گوندسا پارے کہ مقبوضہ کشمیر و ایلو علاقہ غاتیٹی جنگی ڈوہ انا ارتکاب و جنگ انا خواہش نا بنداو آ بھارت تینٹ جہانی برادری ٹی تنیا مننگ ئِ ، مسکوہی نصف صدی نا وخت بھارت تینا غٹ پڑوسی ملک آتا برخلاف نہ صرف جارحیت نا ارتکاب ئِ کرے بلکن اوفتا برخلاف دہشت گردی نا سرپرستی ئِ ہم کرے۔ دا چرجوئی ٹی بھارت دہشت گرد رڑ جوڑ جرے ، تزویراتی اہمیت دوئی کننگ کن پڑوسی ملک آتے نہ صرف نزوری نا گواچی کرے بلکن اوفتا کسر ئِ توننگ و پاکستان نا کیہی بشخ آتیٹی بغاوت، لتاڑنگ و دہشت گردی نا سرپرستی ئِ کرے۔ پاکستانی مندوب پارے کہ بھارتی وزیر خارجہ نا پاکستان نا برخلاف کیہی دوبہ غاتیا مبنی تقریر پاکستان نا برخلاف دروغ انا داوا تا تکرار و تاریخ و حق آمسخرہ خلنگ آن بیدس پین ہچ ہلورہ۔ نن او تقریر اٹی خلوک آ غٹ دوبہ غاتے مسترد کینہ۔ دادوبہ غاک مقبوضہ کشمیر اٹی تعینات 5لکھ آن زیات بھارتی فوجی تا کنڈآن کودک و معصوم کشمیری چنا، نیاڑی و نرینہ غاتا کروک بیدادی آن جہانی برادری نا توجوہ ئِ اسہ پلو کننگ نا سوچوک و سمجھوک ئُ ڈٹ اسے ، کشمیری تا آجوئی نا خواست انا ورندی بھارتی روایتی ظلم و تشدد آن تننگ ئِ۔ ساڑی آ وخت انا وخت آ اسہ سد آن زیات کشمیری خلنگانو ، سد آک بینائی آن محروم مسنو و چنا و نیاڑی تتون اوار ہزار آک ٹھپی مسنو۔ دا ریاستی دہشت گردی نا بدترین انگا دروشم و جنگی جرم ئِ۔ نن بھارت آن خواست کینہ کہ او اقوام متحدہ نا ہائی کمشنر برائے انسانی حق انا تجویز ئِ امنا کرسا مقبوضہ کشمیر اٹی انسانی حق انا خلاف ورزی تا جاست و پاست نا موکل ایتے۔
