پاکستان نامعیشت مثبت سمت اٹی روان مسنے، 2017 ءنا ایسر اسکان بجلی نا تنکی ئِ پوروی اٹ چٹفنگک، جم اونل آف گولڈ مین ساکس پاکستان ئِ 11معیشت آتا رڑ این الیون اٹی اوڑدہ کرینے، دنیا نا گچین بین الاقوامی کریڈٹ ریٹنگ ایجنسی، بین الاقوامی مالیاتی ادارہ ، اقتصادی چاہندار آک پاکستان نا معیشت ئِ گچین جوڑ کننگ کن مسکوہی مسہ نیم سال انا وخت دوئی کروک آ سرسبہی تاستائِ کرینو
نیویارک۔ 23ستمبر (اے پی پی) وزیراعظم محمدنواز شریف پارینے کہ 20 کروڑ نا ورناو فعال آبادی، صارف آتا ودوک آ خواست و اوڑتون اوار اوار سوگو معیشت و سلامتی نا گچین حالیت آتا تناظر اٹی پاکستان کٹیا کروک زرکاری و واپار کن شون و شان وارخواہی نا پیش کش کیک۔ پاکستان و امریکہ نا نیام اٹ ہڑتوم آ کنڈآتا واپار نا مون آ دننگ کن امریکی منڈی تسکان اولیتی واپاری رسینگ تننگے تانکہ پاکستان و امریکہ نا کاروباری بندغ آتے اسہ ایلو تون کاروبار کننگ نا شفاف وارخواہی دوئی مننگ کے۔ ہڑتوم آ کنڈآتا واپار نا مون آ دننگ کن داوڑنا بست و بند المی ئِ۔ وزیراعظم محمد نواز شریف داخیال آتا درشانی ئِ امریکہ پاکستان بزنس کونسل و امریکی ایوان صنعت و واپار نا کنڈآن اسیجائی وڑاٹ تروک آ دے انا اِرغ آن تران کرسا کرے۔ اوپارے کہ ننا معاشی سرسہبیک خاص وڑاٹ ستاکڑزرہ انتئے کہ دا سرسہبی تے نن ہندن ئُ وخت اسے ٹی دوئی کرینن وخت اس کہ نن دہشت گردی نا چٹفنگ کن اہم آپریشن آتیٹی اختہ اُن، دا آپریشنک مچ آ ملک اٹی دہشت گردآتا چٹفنگ کن بناءکننگانو۔ اوپارے کہ اللہ تعالیٰ نا فضل و کرم اٹ نن ریاست نا رٹ ئِ بحال کننگ نا قابل مسونن و تینا جغرافیائی دنگ انا ہر انچ آ ننا عملداری ئِ۔ وزیراعظم پارے کہ پاکستان اٹی سلامتی نا گچین حالیت آتیان مست آن ہی زرکار آتا پت و است خواہی ٹی ودکی مسنے۔ وزیراعظم پارے کہ پاکستان نا اقتصادی شون اٹی نجی بشخ آ پکا یخین تخسا اونا حکومت ہندن ئُ پالیسی جوڑ کرینے ہرافتے آن نجی، ہندی و درملکی زرکار آتے بننگ و ہِننگ نا موقع دوبسنے و اوفتے گچین چاگڑد تننگانے ۔ اوپارے کہ زرکاری پالیسی 2013ءڈیہہ ٹی آزادانہ زرکاری نا وارخواہی فراوان کیک ہراٹی سد درسد درملکی ملکیت نا موکل تننگانے و کاروبار کننگ کن وڑوڈول ئِ آسان و اوڑآ چست مروک آ خڑچ آتے کم کننگانے و صنعت و واپار کن رابطہ غاتے ودی کننگانے۔ اوپارے کہ پاکستان اٹی توانائی ، تیل و گیس ،انفارمیشن ٹیکنالوجی، بنداوی ڈھانچہ ، کنزیومر گڈز، مالیاتی خذمت و سرمایہ نا منڈی تا بشخ اٹی زرکاری نا پرکشش وارخواہی ساڑی ئِ۔ وزیراعظم داوخت آ درشان کرے کہ امریکی ایوان واپار و امریکہ پاکستان بزنس کونسل ہڑتوم آ ملک آتے دا چرجوئی ٹی خڑک اتنگ و امریکی انتظامیہ و کانگریس ئِ اونا افادیت آ قائل کننگ کن تینا کڑد ئِ ادا کیک۔ اوپارے کہ ہڑتوم آ ملک آتا الس و کاروباری بندغ آتا نیام اٹ تعلقداری ئِ سوگو جوڑ کننگ کن دا کمکار ثابت مریک۔ وزیراعظم پارے کہ او پکا یخین تخک کہ سوگو واپاری و اقتصادی تعلقداری الس نا کہول آ سوگو و سریس وختی رابطہ غاتے کن بے کچ المی ئِ ۔ اوپارے کہ امریکہ پاکستان نا اہم اقتصادی و واپاری شریدار مسنے ، دا شریداری ہڑتوم آ ملک آتا نجی کاروباری بندغ آتے کن فائدہ مند ئِ و پاکستان نا شون اکن ہم المی ئِ واہم اوپارے کہ ہڑتوم آملک آتا نیام اٹ واپار و زرکاری نا کچ جہانی رجحانات آتا رداٹ اف۔ اوپارے کہ داہیت انا ادراک ئِ کرسا امریکی صدر براک اوباما و ای اکتوبر 2013ءٹی مروک آاوڑدہی ٹی بروک آ پنچ سال انا وخت ہڑتوم آ کنڈآتا واپار و زرکاری ئِ ودفنگ کن اسیجائی لائحہ عمل اس وضع کننگ کن اواری اٹ کاریم کننگ آ اتفاق کریسن۔ وزیراعظم پارے کہ اوسمجھک کہ ہڑتوم آ ملک آتا نیام اٹ گہرے واپاری ، اقتصادی و زرکاری کمکاری نا گیشتر وارخواہی ساڑی ارے۔ اوشریک مروک آتون پارے کہ بحیثیت کاروباری کسرشون زرکار و صنعت کار نما کڑد ہڑتوم آ حکومت آتے دا وارخواہی تیان پورووڑاٹ مستفید مننگ نا قابل جوڑ کننگ کن بے کچ اہم ئُ۔ وزیراعظم پارے کہ جون 2013ءٹی اقتدار ئِ سنبھالنگ آن پد آن معیشت ئِ سہی سمت اٹی روان کننگ، توانائی تنکی نا مون ئِ توننگ، دہشت گردی و انتہاءپسندی تون مون تننگ و تعلیم اٹی زرکاری کنا حکومت نا اہم اولیت آک ئُ۔ اوپارے کہ ای پاکستان اٹی مروک آ شون نا سرجم احوال آتیان نمے معلومدار کرسا خوشی محسوس کننگ اٹی اُٹ۔ اوپارے کہ دلیرانہ اقتصادی اصلاحات آتا نتیجہ ٹی اونا حکومت غٹ اہم اقتصادی ٹک آتیٹی نمان سرسہبی دوئی کرینے۔ پاکستان نا شرح نمو ٹی ودکی مننگ ئِ و بجٹ نسخان اٹی کمتی بسنے۔ پاکستان اٹی گڑاس اقتصادی ٹک آتا جاچ ئِ پیش کرسا وزیراعظم پارے کہ حکومتی گام گیج آتا بدولت پاکستان اٹی افراط زر 3درسد آن شیف بسنے ہراکہ مسکوہی 47سال اٹی غٹ آن کم ئِ۔ اوپارے کہ سٹیٹ بینک آف پاکستان مئی 2016ءٹی تینا مالیاتی پالیسی ٹی ڈسکاﺅنٹ ریٹ 5.75درسد اسکان کم کننگ نا پڑو ئِ کرے و داہم مسکوہی چار عشرہ ٹی غٹ آن کم ئِ۔ وزیراعظم پارے کہ مورگن سٹینلے کیپٹل انٹرنیشنل نا کنڈآن کراچی اسٹاک ایکسچینج ئِ مون آ بروک آمارکیٹ گوندنگ اسہ اہم ئُ پیش رفت اسے۔ اوپارے کہ پاکستان نامعیشت مثبت سمت اٹی روان مسنے و سال 2015-16ءٹی 4.71درسد گروتھ خننگانے ہراکہ مسکوہی عشرہ ٹی غٹ آن زیات ئِ۔ اوپارے کہ پاکستان اٹی تذویراتی نجی بشخ انا اوار مننگ نا پروگرام نا سرسہب بحالی نا دُوارہ بناءمسنے۔ وزیراعظم پارے کہ حکومت تھری جی و فورجی سپیکٹرم لائسنس آتا سرسہب نیلامی ئِ کرے۔ ہراڑآن ملک اٹی مواصلات و ڈیٹا ٹرانسفر نا گیشتر وارخواہی دوبسنے۔ اوپارے کہ پاکستان آئی ایم ایف پروگرام ئِ زوت پورو کیک، پاکستان نا تاریخ اٹی ارٹ میکو وار آئی ایم ایف پروگرام نا سرسہب پوروی پاکستان نا گچین معیشت و حکومت نا کنڈآن معاشی بشخ اٹی کروک آ اصلاحات آتا سوگو عکاسی ئِ کیک۔ وزیراعظم پارے کہ ٹیکس ٹوجی ڈی پی نا کچ 12.5درسد سرمسنے وخت اس کہ ساڑی آ حکومت ئِ ہراتم میرات اٹی بھس مروک معیشت ملا تو دا کچ 9 درسد ئس۔ اوپارے کہ دا کچ اٹی پین گچینی نا گنجائش ساڑی ئِ ہرانا دوئی کن نن پرعزم اُن۔ اوپارے کہ کراچی اسٹاک ایکسچینج دنیا نا گچین سٹاک مارکیٹس آتا وڑاٹ کاریم کننگ ئِ و مسکوہی مالی سال نا ایسری آ دا 37783پوائنٹس آ بند مس۔ اوپارے کہ داسا دا 40500 پوائنٹس آ کاروبار کننگ ئِ۔ اوپارے کہ جم اونل آف گولڈ مین ساکس پاکستان ئِ 11معیشت آتا رڑ این الیون اٹی اوڑدہ کرینے ہرانا بارواٹی بروک آ عشرہ نا وخت ترندی اٹ اقتصادی شون ہلنگ نا گمان ظاہر کننگانے۔ اوپارے کہ بلوم برگ پاکستان ئِ 2014ءٹی گچین کارکڑد نا حامل 10 منڈی تیٹی مسٹ میکو نمبر آ و2016ءٹی ممکنہ زرکاری نا گچین ملک آتیٹی 14می نمبر آ شمارکرینے۔ اوپارے کہ اسہ پین بھلو چیلنج اس ہرا پاکستان ئِ مون تروک ئِ او توانائی نا کاختی ئِ و کنے خوشی ئِ کہ حکومت نا کنڈآن اختیار کروک جامع حکمت عملی نا بدولت توانائی نا ترسیل، کم ازکم صنعتی بشخ اکن، مست انا مقابلہ ٹی بھاز گچین ئِ و اوٹی پین گچینی بریک۔ اوپارے کہ ملک اٹی توانائی نا اہم ڈٹ آتیا کاریم جاری ئِ۔ وزیراعظم پارے کہ مسکوہی اسہ سال آن صنعتی بشخ اکن بجلی نا ہچ ئُ کاختی اس اف و 2017ءنا ایسر اسکان بجلی نا تنکی نا پورو خاتمہ ئِ کننگک۔ وزیراعظم پارے کہ گلوبل بانڈ مارکیٹ اٹی پاکستان نا اوار مننگ و اوڑآن دوئی مروک آ کٹیا و پاکستان اسٹاک ایکسچینج نا نمان کارکڑد آن حکومت نا زرکار دوست پالیسی و پاکستان آ زرکار آتا ودوک آ پت انا عکاسی مریک۔ داوخت آ جہاز ساز کمپنی بوئنگ نا ڈائریکٹر انٹرنیشنل آپریشنز اینڈ پالیسی داخواہش نا درشانی ئِ کرینے کہ اونا کمپنی پی آئی اے تون شراکت نا خواہندار ئِ و شفاف و مسابقتی عمل نا کمک اٹ پی آئی اے نا پریمیئر کن بوئنگ 777و 787جہاز فراوان کننگ کن تیار ئِ۔ پراکٹر اینڈ گیمبل نا صدر سلینگ اینڈ مارکیٹنگ آپریشن پارینے کہ اونا کمپنی مست ہی پاکستان اٹی تینا گروتھ اٹی 20 درسد ودکی دوئی کرینے و نن پاکستان اٹی سویلین امریکی ڈالر نا پین زرکاری کن تیار اُن۔ فلپ مورس نا نائب صدر ساڑی آ بجٹ ئِ پوریاگرو زرکار دوست گوندسا پارے کہ اونا کمپننی پاکستان اٹی کاروبار کننگ خواہک۔ اے پی آر انرجی نا چیئرمین پارے کہ اگہ اونا کمپنی ئِ پرکشش ٹیرف نا پیش کننگک تو او پاکستان اٹی 350 میگاواٹ نا گیس پاور پلانٹ نا تنصیب کن تیار ئِ۔ دے انا اِرغ اٹی شریک نمان امریکی پوریا گر و صنعت کار آتیٹی امریکی چیمبر آف کامرس نا ایگزیکٹو نائب صدر آن بیدس سینئر نائب صدر و امریکہ پاکستان بزنس کونسل نا صدر، پیپسی نا نائب چیئرمین ، موٹرولا سلو شنز نا نائب صدر، اے پی آر انرجی نا چیئرمین ، کارپوریٹ و انویسٹمنٹ بینکنگ نا وائس چیئرمین ، موٹرولا سلوشنز نا ڈائریکٹر ، فلپ مورس نا نائب صدر، بوئنگ کمپنی نا انٹرنیشنل آپریشنز و پالیسی نا ڈائریکٹر، ویژن نیٹ سسٹمز نا چیف ایگزیکٹو آفیسر، افریقہ دے ٹکی نیامی ڈیہہ نا منیجر ، کیٹی پلر انشورنس ای پی سی نا ایگزیکٹو نائب صدر، مرجر اینڈ ایکوزیشن میٹلائف نا ایسوسی ایٹ جنرل قونصل ، پراکٹر اینڈ گیمبل نا صدر سیلنگ اینڈ مارکیٹنگ آپریشنز ، پاکستان پروجیکٹ لیڈر ایکسن موبل، ایم سی لارٹی ایسوسی ایٹس نا سینئر ایڈوائزر، یورپ ، دے ٹکی نیامی و افریقہ لاک ہیڈ کمپنی نا نائب صدر، ترکی، دے ٹکی نیامی ، افریقہ الینکو انیمل ہیلتھ نا علاقائی کسرشون، ایگلوی پبلک نارتھ روپ گرومن نا سی ای او ، پیگاسس اینڈ اکین گمپ اوارئسر۔
