اسلام آباد۔ 23ستمبر (اے پی پی) صدر مملکت ممنون حسین پارینے کہ اسلامی ملک آتا نیام اٹ واپار اٹی ودکی بھاز المی ئِ ، او آئی سی نا باسک ملک آک تینا گرج آتے اسلامی ملک آتا مصنوعات آتیان پورو کیر۔ پاکستان و مراکش نا نیام اٹ تین پہ تینی واپار لائخی آن کم ئِ ہرادے ودفنگ نا گرج ئِ۔ اوداہیت ئِ جمعہ آ مراکش نا سبکدوش مروک آ سفیر مصطفی صلاح الدین تون ایوان صدر اٹی اوڑدہی نا وخت آ پارے۔صدر مملکت پارے کہ واپار اٹی ودکی کن پاکستان و مراکش نا نیام اٹ بے المی ٹیکس آک بایدے چٹر تانکہ واپاری سرجزآک ودیرو ہڑتوم آ قومک اسہ ایلونا پین خڑک مریر۔ صدر مملکت پارے کہ پاکستان اٹی زرکاری کن چاگڑد سازگار ئِ ہرانا فائدہ مراکش نا زرکار آتے ہرفوئی مرے۔ اوپارے کہ پاکستان و مراکش نا نیام اٹ تعلیم ، دودوربیدہ و ایلو بشخ آتیٹی ڈل انا درشان آتیٹی بایدے ودکی مرے۔ صدر مملکت پارے کہ مراکش نا الس تینا ڈیہہ ٹی تینا گچین طرز عمل نا سوب بھاز پنی ئِ ۔ اومراکش نا وزیراعظم عبداللہ بین کیرین نا سروکی ٹی مراکش نا شون و شونہالی نا کنڈا سفر نا ہم ستائِ کرے۔ صدر مملکت مراکش نا سروک و الس کن نیک است خواہی تا درشانی ئِ کرے۔ داوخت آ سبکدوش مروک آ مراکش نا سفیر پاکستانی حکومت نا علاقائی و جہانی معاملہ غاتیٹی مراکش نا مخ تفی آمنت واری ئِ ادا کرے۔
