ایوان صدر اٹی اڈہلوک آ دود اٹی آرمی چیف ، سیکرٹری دفاع، ترک سفیر و ایلو بڑزکو کمامدارآک شرکت کریر
اسلام آباد۔ 21ستمبر (اے پی پی) صدر مملکت ممنون حسین ترک لینڈ فورس نا سروک جنرل صالح ذکی چولاک ئِ چارشنبے آ ایوان صدر اٹی اسہ پروقار دود اسے ٹی بڑزکو فوجی اعزاز نشان امتیاز(ملٹری) اس عطاءکرینے۔ اودے دا اعزاز پاکستان و ترک فورسز آتا نیام اٹ کمکاری ٹی ودکی کن غیرمعمولی خذمت آتیا تننگا۔ دود اٹی آرمی چیف جنرل راحیل شریف ، سیکرٹری دفاع، پاکستان اٹی تعینات ترکی نا سفیر صادق بابر گرگن آن بیدس ایلو بڑزکو کمامدارآک ہم شرکت کریر۔ داوخت آ صدر مملکت پارے کہ پاکستان و ترکی نا نیام اٹ خڑکی و برادرانہ تعلقداریک استوار ئُ و پاکستان ترکی تون تینا تعلقداری تے دفاع نا بشخ اٹی پین سوگو کننگ نا خواہش مند ئِ۔ داوخت آ ترکش لینڈ فورس انا سروک جنرل صالح ذکی چولاک پارے کہ پاکستان و ترکی نا برادرانہ تعلقداری تا روتہ غاک تاریخ اتون گنڈوک ئُ ۔ اوپارے کہ ترک آجوئی جنگ انا وخت برصغیر نا مسلمان تا کنڈآن تروک آ کمک ئِ ترک الس ہمیش گچین لوز آتیٹی یات کرینے۔ جنرل صالح ذکی صدر مملکت و حکومت پاکستان نا منت واری ءِ ادا کرسا پارے کہ دااوڑکن بھلو اعزاز اسے ناہیت اسے کہ اودے نشان امتیاز(ملٹری) تننگا۔ اودااومیت نادرشانی ئِکرے کہ آخبت اٹی ہڑتوم آ ملک آتا نیام اٹ پین پوسکنا کسک استوار مریرہ و ہڑتوم آ ملک آک اواری اٹ دہشت گردی ، مہاجر و سیمی سلامتی کون آ ویل آتا مون ئِ توریرہ۔
