اسلام آباد۔ 27مئی (اے پی پی) صدر مملکت آصف علی زرداری پارینے کہ پدریسہ ویکسی نیشن مہم، گچین چاروکی، ہیلتھ ورکرآتا جیرت اٹی پولیو کیس آتیٹی 99 درسد آن زیات کمتی بسنے۔ پولیو فری پاکستان نا کوشست آتے بے سہب کننگ نا مسخت آن کروک آ لغور انگا جلہو آتیٹی جون تے ندر کروک آ پولیو ورکرز و سیکورٹی کارندہ غاتے خراج عقیدت پیش کینہ، ننے پولیو ورکرآتا رکھ ءِ پک کروئی مریک، ہمووخت اسکان آسرات تولپنہ ہراتم اسکان پولیو پورو چٹنگپ۔ سے شنبے نادے آ ایوان صدر نا پریس ونگ انا رداٹ صدر مملکت پولیو نا چٹفنگ کن مچ آ ملک مہم آ تینا کلہو اٹی پارے کہ 26 مئی آن یکم جون اسکان پاکستان اسہ ملک گیر پولیو ویکسی نیشن مہم اسے نا بناءِ کرینے، پولیو مہم نا ہدف پنچ سال آن کم وئی نا 4 کروڑ 54 لکھ چناتے رکھی پڑی کنفنگ ءِ۔ صدر مملکت پارے کہ دامہم اٹی 4 لکھ آن زیات ورکرزننا شار، خلق و مرمر انگا اُراتیا ہنسا زند ءِ بچفوک آ پولیو نا پڑی کنفرہ ، ننا دا مہم نا مسخت پولیو نا پورو چٹفنگ و قوم انا دراخ جوڑ آخبت ءِ پک کننگ ءِ۔ صدر آصف علی زرداری لمہ و باوہ غاتیان خواست کرے کہ او پولیو ورکرآتیکن تینا درگہ ءِ ملر و تینا چناتے دا زند ءِ تروک پڑی ضرور کنفر۔ صدر مملکت پارے کہ ننے ویکسین نا بابت غلط گمانی تے مر کروئی مریک، ای استاد، عالم دین و کمیونٹی آن خواست کیوہ کہ دامسخت نا مخ تفی ءِ کیر، غلط گمانی تے چٹفر و مخلوق اٹ پت ودی کیر۔ اومیڈیا غان خواست کرے کہ مخلوق اٹ آگاہی ودی کیر کہ پولیو ویکسین رکھ، گچین وننا غٹ آن واکدار سلہہ ءِ۔ صدر مملکت پارے کہ ای تینا مسڑ و خاتون اول آصفہ بھٹو زرداری نا پورو مخ تفی ءِ کیوہ ہرافتا جہد و گچین مہم پولیو نا برخلاف جنگ ءِ ترند کرے، آصفہ بھٹو زرداری نا لمہ و باوہ، ذی اثر راجی شخصیت و ورناتیان خواست ننے یات ترفک کہ پولیو نا چٹفنگ ننا اسیجائی زمواری ءِ۔ صدر مملکت پارے کہ 90 نا دہائی آن داتم اسکان پاکستان پولیو نا برخلاف شاندار پیش رفت کرینے۔ اونوشکے ٹی پولیو ٹیم آ مروک آ جلہو نا مذمت ءِ کرے و جلہو اٹی شہید مروک آ پولیس کارندہ نا خاہوت تون ہڑزخواہی کرے۔ صدر مملکت پارے کہ ای ہموبہادر پولیو ورکرآتے خراج تحسین پیش کیوہ ہراہرچنااسکان سرمننگ کن تینا جون تے خطرہ ٹی شاغرہ۔ صدر مملکت پارے کہ پدریسہ ویکسی نیشن مہم، گچین چاروکی، ہیلتھ ورکرآتا جیرت اٹی پولیس کیس آتیٹی 99 درسد آن زیات کمتی بسنے، پولیو نا برخلاف جنگ داسکان چٹتنے، 2024ء ٹی پولیو کیس آتیٹی ودکی داہیت انا عندیہ ءِ کہ ننے تینا کوشست آتے پین ترند کروئی مریک۔ اوپارے کہ مرمر انگا علاقہ و ہمپوک آتسکان رسینگ داسہ ہم اسہ چیلنج اسے، ننے ویکسی نیشن نا کچ ءِ بڑزکوکہول آ برقرارتخوئی مریک تانکہ دین ءِ پورو چٹفنگ ممکن مننگ کے، نن ہمووخت اسکان آسرات تولپنہ ہراتم اسکان پولیو چٹپ۔ صدر مملکت پارے کہ کنے یقین ءِ کہ نن غٹ اواری اٹ پاکستان ءِ پولیو آن پاک کننگ کینہ، ببو ، ہرچناءِ ویکسین ایتن و تینا قوم ءِ دا ژند کروک آ دین آن بچفن۔
