تہران ۔27مئی (اے پی پی): مزن وزیر محمد شہباز شریف ایران ءِ دو روچی تر ءُ تاب ءِ سرجم کنگ ءَ پد آذربائیجان ءَ روادگ بوتگ۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ تہران ءِ مہر آباد ائیر پورٹ ءِ سر ءَ ایران ءِ تہی کارانی وزیر اسکندر مومنی، پاکستان ءَ ایران ءِ سفیر رضا امیری مقدم، ایران ءَ پاکستان ءِ سفیر مدثر ٹیپو ءُ مزنیں سفارتی کارندہ آں مزن وزیر شہباز شریف ءُ پاکستانی ڈل ءَ را برو پہ ھیر کت۔ وتی تر ءُ تاب ءِ وھد ءَ مزن وزیر ءَ مزن وزیر آیت اللہ سید علی خامنہ ای ءِ ھواری ءَ ایران ءِ صدر ڈاکٹر مسعود پزشکیان ءَ گوں گند ءُ نند کت۔ گند ءُ نند ءَ پاکستان ءُ ایران ءِ سیادی ھاسیں رنگ ءَ بیپار ءُ دمگی سیادی آنی سہرا کنگ ءِ بابت ءَ گپ ءُ تران کنگ بوت۔ گند ءُ نند آنی تہ ءَ دمگی جیڈھ آنی سر ءَ گپ ءُ تران کنگ بوتگ ءُ ھندوستان ءِ نیمگ ءَ پاکستان ءِ سر ءَ لگت داتگیں جنگ ءِ وھد ءَ دمگ ءَ امن ءِ واستہ ایران ءِ کوشست آناں ساڑاتگ بوتگ۔ دوئیں ملک آنی نیام ءَ اسٹریٹجک سیادی آناں مھکم کنگ ءَ ابید غزہ ءَ برجاھیں صیہونی ظلم ءِ ترندی ءَ چہ ھلاس کنگ ءُ پائیدار ءُ دیریں جنگ بندی ءِ ھوالگ ءَ گپ ءُ تران ھم اے گند ءُ نند آنی بھر ات۔ مزن وزیر ایران ءِ دو نیمگی تر ءُ تاب ءَ سرجم کنت ءُ آذربائیجان ءِ صدر ءِ دعوت ءِ سرا آذربائیجان ءِ تر ءُ تاب ءَ کنت۔ ترکی ءُ ایران ءَ پد مزن وزیر وتی چار ملکی تر ءُ تاب ءِ سیمی بھر ءِ واستہ آذربائیجان ءِ نیمگ ءَ روگ ءَ اِنت۔ ایشی ءَ پد مزن وزیر محمد شہباز شریف تاجکستان ءِ تر ءُ تاب ءَ کنت۔
