تہران۔ 27مئی (اے پی پی) وزیراعظم محمد شہباز شریف ایران نا اِرادے ئی دورہ ءِ پورو کرسا آذربائیجان کن روانہ مس۔ سے شنبے نادے آ وزیراعظم آفس نا میڈیا ونگ آن جاری بیان نارداٹ تہران نا مہرآباد بالی پٹ آ ایرانی وزیرداخلہ اسکندر مومنی، پاکستان اٹ ایران نا سفیر رضاامیری مقدم، ایران اٹ پاکستان نا سفیر مدثر ٹیپو و بڑزکو سفارتی کارندہ غاک وزیراعظم شہباز شریف و پاکستانی ڈل ءِ رخصت کریر۔ وزیراعظم تینا دورہ ٹی سپریم لیڈر آیت اللہ سید علی خامنہ ای تون اوار اوار ایرانی صدر ڈاکٹر مسعود پزشکیان تون اوڑدہی کرے۔ اوڑدہی تیٹی پاکستان ایران تعلقداری خاص کر واپار و علاقائی رابطہ غاتا مون آ دننگ آ گپ وتران مس۔ اوڑدہی تیٹی علاقائی امور آ گپ وتران و بھارت نا پاکستان آ مسلط کروک جنگ اٹی ایران نا ڈیہہ اٹی امن نا کوشست آتا ستاءِ کننگا۔ ہڑتوم آملک آتا نیام اٹ سٹریٹجک تعلقداری نا سوگوی آن بیدس غزہ ٹی برجاصیہونی ظلم وجور انا دمدستی توننگ و پائیدار و دیرپا جنگ بندی آ گپ وتران اوڑدہی تا بشخ ئس۔ وزیراعظم تینا ہڑتوم آ کنڈآتا دورہ ءِ ایران ءِ پورو کرسا آذری حکومت نا سلہ غا آذربائیجان نا دورہ ءِ کیک۔ ترکیہ ویران آن پد وزیراعظم تینا چار ملک آتا دورہ نا مسٹ میکو ریسہ کن آذربائیجان آ ہِننگ ءِ۔ وزیراعظم محمد شہباز شریف اوکان پد تاجکستان آ کاہک۔
