نیویارک۔ 22اپریل (اے پی پی) بنجائی وزیر داخلہ چوہدری نثارعلی خان سری لنکا نا وزیر داخلہ سگالارتنانائیکے ئِ پاکستان نا دورہ نا سلہ تسنے۔ سری لنکن وزیرداخلہ نا دورہ نا مسخت ہڑتوم آ ملک آتا تین پہ تینی تعلقداری تے پین سوگو جوڑ کروئی ئِ۔ پاکستان و سری لنکا نا وزیر داخلہ نا اہم اوڑدہی اقوام متحدہ نا جنرل اسمبلی نا خصوصی دیوان نا وخت آ مس ۔ دادیوان دنیا ٹی منشیات وجرم انا چٹفنگ کن جہانی حکمت عملی اس وضع کننگ کن بٹنگ انگاسس۔ دیوان اٹی پاکستان نا نمائندگی ئِ وزیر داخلہ چوہدری نثارعلی خان نا سروکی ٹی اسہ 7باسکی ڈل اس کرے۔ ہراٹی اقوام متحدہ ٹی پاکستان نا خصوصی مندوب ڈاکٹر ملیحہ لودھی ، بنجائی سیکرٹری انسداد منشیات ڈویژن اعجاز علی شاہ ، ڈائریکٹر جنرل انٹی نارکوٹکس فورس میجر جنرل ناصر دلاور و ایلوک اوار ئسر۔ اقوام متحدہ ٹی پاکستانی مشن نا کنڈآن جاری بیان نا رداٹ سری لنکن وزیر داخلہ چوہدری نثارعلی خان تون تینا اوڑدہی نا وخت آ اودے سری لنکن حکومت نا کنڈآن پاکستان کن نیک خوائش آتا کلہو ئِ تس و ہڑتوم آ ملک آتا نیام اٹ برادرانہ تعلقداری تا مون آ دننگ آ زورشاغا۔ اوڑدہی نا وخت چوہدری نثارعلی خان تینا سری لنکن ہم منصب تون ہڑتوم آ ملک آتا نیام اٹ انسداد منشیات نا کمکاری کن اسیجائی پالیسی اس وضح کننگ و گام گیج آتیا زور شاغار۔ اقوام متحدہ نا جنرل اسمبلی نا دا خصوصی دیوان اٹی تقریر کرسا بنجائی وزیر داخلہ چوہدری نثارعلی خان منشیات آتا چٹفنگ کن پاکستان نا حکمت عملی نا بارواٹی پالیسی بیان تس و ڈل انا ایلو باسک آک ایلو جہانی ڈل آتون دا سرحال آ اہم اوڑدہی تے کریر۔
